काठमाडौँ । कानुन, न्याय तथा संसदीय मामिलामन्त्री अजयकुमार चौरसियाले सरकारले राम्रो कानुन बनोस् भन्नेकुरामा यथेष्ट ध्यान दिएको बताएका छन् ।
बुधबार संघीय संसद् प्रतिनिधि सभा अन्तर्गतको कानुन, न्याय तथा मानव अधिकार समितिको बैठकमा विधायन सम्बन्धमा व्यवस्था गर्न बनेको विधेयकमाथि सांसदहरूले उठाएका प्रश्नको जवाफ दिने क्रममा उनले सो कुरा बताएका हुन् ।
मन्त्री चौरसियाले सो विधेयकले पनि कानुन निर्माणका लागि संसद्लाई अझ बढी अधिकार दिने व्यवस्था राखेको उल्लेख गरे । संसद्लाई पनि अझ सशक्त ढंगले कानुन बनाउन अधिकार दिने व्यवस्था सो विधेयकले गरेकाले कानुन निर्माणको प्रक्रिया अझ बढी प्रभावकारी हुने उनको विश्वास थियो । मन्त्री चौरसियाले कानुन निर्माणको कामलाई अझ पारदर्शी, व्यवस्थित र गुणस्तरीय बनाउने कुरामा सरकारले अन्तर्राष्ट्रिय प्रचलनलाई ध्यान दिएर अघि बढ्ने प्रतिबद्धता व्यक्त गरे । उनले कानुन निर्माणको प्रक्रियालाई व्यवहारिक रूपमा नै अझ बलियो बनाउनका लागि विधायन सम्बन्धमा व्यवस्था गर्न बनेको विधेयक सरकारले संसदमा ल्याएको दाबी समेत गरे ।
उनले भने, ‘यो कानुन बनाउने कुरालाई पारदर्शी बनाउने कुरा, व्यवस्थित बनाउने कुरा, गुणस्तरीय बनाउने कुरा र अझ कानुन बनाउने कुरालाई व्यवहारिक बनाउने कुरा र अन्तर्राष्ट्रिय प्रचलनलाई पनि, सरोकारवालालाई समेत छलफल गरेर अझ राम्रो कानुन बनोस्, पहिलो चोटी यो कानुनले सरकारलाई पनि बाधेको छ ।’
मन्त्री चौरसियाले सरोकारवालाहरूको सुझावलाई कानुन निर्माण प्रक्रियामा विशेष ध्यान सरकारले दिने पनि बताए ।
