दाङ। जिल्लाको बेलझुण्डीमा अन्तर्राष्ट्रियस्तरको फुटबल रङ्गशाला छ। सोही ठाउँमा एथ्लेटिक्सको सिन्थेटिक ट्रयाक छ। त्यही गौरवको उक्त रङ्गशाला संरक्षण गर्ने जिम्मा–दाङ जिल्ला खेलकुद विकास समिति हो। तर त्यही समितिका कार्यालय प्रमुख बस्ने कोठा सुरक्षित छैन।

सोही रङ्गशालासँगै निर्माण भएको नयाँ भवन अस्तव्यस्त छ। छतमा राखिएको जिप्सन पूरै भाँचिएको छ। गत जेठमा आएको हुरीबतासले पूरै जिप्सन उप्किए पनि त्यसको मर्मत हुनसकेको छैन। ‘हामीले मर्मतका लागि पटकपटक सम्बन्धित निकायमा भनेका छौँ,’ कार्यालय प्रमुख शान्ति सोमैले भनिन्, ‘तर सुनुवाइ भएको छैन।’

कतिबेला माथिबाट सबै खसेर चोट लाग्ने भन्ने डरैडरमा बस्ने गरेको प्रमुख सोमैले दुखेसो पोखिन्। २०७६ सालमा उक्त भवन निर्माण भएको हो। दुईवटा कोठामा त्यस्तो समस्या देखिएको प्रमुख सोमैले बताइन्।

रंशालामा उम्रियो घाँस
त्यस्तै यहाँको फुटबल रङ्गशालामा पनि घाँस उम्रिएको छ। त्यहाँ उम्रिएको घाँस काट्ने औजार छैन। घाँस काट्नका लागि सेनालाई गुहार्नुपर्छ। केही महिनाअघि घाँस काटेको भए अहिले पुनः पलाएर ठुल्ठूलो भएको छ। त्यो मेसिन खरिदका लागि पनि पटकपटक माग गरेको भए पनि प्राप्त हुन नसकेको कार्यालय प्रमुख सोमैले बताइन्। त्यसले गर्दा पनि यसरी घाँस उम्रिने गरेको उनले बताइन्।

अन्तराष्ट्रियस्तरको उक्त रङ्गशालामा आठौं राष्ट्रिय फुटबल तथा एथ्लेटिक्स प्रतियोगिता भएका थिए। २४ करोड २४ लाख लागतमा रङ्गशाला निर्माण भएको हो। दिवा एवं प्रतिष्ठा जेभीले भिआइपी प्यारापिटसहितको रङ्गशाला निर्माण गरेको हो।

रङ्गशालामा भीआईपी प्यारापिट, बाथरुम, बिजुली र रङरोगनसमेत गरिएको छ। रङ्गशालामा फुटबल मैदानका साथै सेन्थेटिक ट्रयाक पनि निर्माण गरिएको छ। जुन मोफसलमा पहिलो हो। त्यहाँ भीआईपी प्यारापिटभित्र खेलाडीका लागि चेन्जिङ रुम, अफिस, कन्फ्रेन्स हल, रेफ्रीका लागि छुट्टै कोठा निर्माण गरिएको छ।

रङ्गशालाको पश्चिमतर्फ निर्माण गरिएको भीआईपी प्यारापिटमा चार सय १२ सिट छन्। रङ्गशालाको पूर्वी भागमा दर्शकका लागि साधारण प्यारापिट निर्माण गरिएको छ। भीआईपी प्यारापिटका लागि आवश्यक धातु तथा दर्शक बस्ने सिट मलेसियाबाट ल्याइएको हो।

रङ्गशालामा प्रयोग गरिएका तारबारसमेत विदेशबाटै ल्याइएको हो। फिफा मापदण्डअनुसार निर्माण गरिएको फुटबल मैदानमा ‘बरमुडा’ दुबो रोपिएको छ। यो दुबो भारतको कोलकाताबाट ल्याएर रोपिएको थियो।