प्रमुख प्रतिपक्षी नेकपा (माओवादी केन्द्र) ले सरकारलक्षित खबरदारी सभा देशव्यापी बनाउने भएको छ । काठमाडौंको प्रदर्शनीमार्गमा शनिबार आयोजित सभालाई सम्बोधन गर्ने क्रममा सो पार्टीका अध्यक्ष पुष्कपमल दाहाल ‘प्रचण्ड’ले खबरदारी सभालाई देशव्यापी बनाउने बताएका हुन् ।

दाहालले काठमाडौंमा आयोजना गरिएको खबरदारी सभाकै प्रकृतिका सभा आयोजना गर्ने कार्यतालिका बनाएर पार्टीका तल्लो तहलाई परिपत्र गर्ने तयारी गरिएको बताए ।

‘यो खबरदारी सभालाई अब देशका सबै पालिकामा, देशका सबै वडामा हामी कार्यक्रम बनाएर पठाउने छौँ,’ दाहालले भने ।

प्रचण्डले अब सरकारविरुद्ध वडा तहसम्म कार्यक्रम गर्ने र सरकारले गम्भीरतापूर्वक नलिए खबरदारी सभा, विरोध सभा र आन्दोलनमा परिणत हुने चेतावनी पनि दिए ।

‘देशभरी विशाल खरबदारीसभा गरेर, अनि अन्तिममा जरुरी परेर सरकारले निहुँ खोज्यो भने हामी सदनभित्र विशेष अधिवेशन माग गर्नेछौँ,’ उनले भने, ‘हामी संवैधानिक तरिकाले उनीहरूका विरुद्ध संघर्षमा जानेछौँ । उनीहरूले हाम्रो कुरालाई गम्भीर रूपले लिएनन् भने यो खबरदारी सभा विशाल विरोध सभा र आन्दोलनमा परिणत हुनेछ । अब हेक्का राख्ने जिम्मा सरकारकै हो ।’

माओवादी अध्यक्ष दाहालले जनतासँग मिलेर माओवादीले नयाँ अभियानमार्फत् समाजवादी क्रान्तिको आधार तयार पर्ने सङ्कल्प गरेको भन्दै यसलाई कसैले खेलाँची नठान्न पनि सुझाव दिए । ।

‘आज छोटो समयको सूचनामा तपाईंहरुको अपार उपस्थिति र उत्साहले हामीलाई नयाँ ऊर्जा दिएको छ, नयाँ आन्दोलनका निम्ति, नयाँ अभियानका निम्ति १ हामी हतारोमा छैनौँ,’ दाहालले भने, ‘तर, जनतासँग मिलेर एउटा नयाँ अभियानमार्फत् समाजवादी क्रान्तिको आधार तयार पर्ने सङ्कल्पमा छौँ । यसलाई कसैले खेलाँची नठानोस् ।’