सञ्चार तथा सूचना प्रविधिमन्त्री पृथ्वीसुब्बा गुरुङले सरकारको ध्यान सुशासन कायम गर्नेमा केन्द्रित रहेको बताएका छन् । नेपाल पत्रकार महासङ्घले बुधबार काठमाडौंमा आयोजना गरेको शुभकामना आदान प्रसाद कार्यक्रममा मन्त्री गुरुङले भ्रष्टाचार अन्त्य गरि मुलुकमा सुशासन कायम गर्नेमा सरकारको ध्यान रहेको र यसमा सबैको साथ आवश्यक रहेको बताएका हुन् ।
अहिले मुलुक बनाउने भन्दा पनि लुट्ने र खानेमा केहीको ध्यान केन्द्रित देखिएकाले सञ्चारमाध्यमले सचेत र सजग गराउनुपर्नेमा उनले जोड दिए । मन्त्री गुरुङले राजस्व वृद्धिदर, पूँजीगत खर्च बढाउने र मुलुकलाई आर्थिक वृद्धि गर्न सरकारले लिएको लक्ष्यमा समेत सञ्चारमाध्यमले आवश्यक साथ दिनुपर्ने बताए।
अहिले पनि सामाजिक सद्भाव भत्काउने प्रयास भइरहेकाले सबै सजग हुनुपर्ने उनको भनाइ छ । उनले सञ्चारमाध्यमलाई राज्यको नियन्त्रणमा राख्ने सरकारको नीति नरहेको र अव बन्ने कानूनमा स्वमूल्याङ्कनको प्रस्ताव गरिएको उल्लेख गरे ।
