नेपालका सवारी चालक, त्यसै पनि अटेरी गर्छन्, पैदलयात्री र साइकल यात्रीलाई हेप्नुसम्म हेप्छन् । लेनको पालना र हर्न निषेधित क्षेत्रको बेवास्ता गर्ने सवारी चालकहरू जेब्राक्रसमा बाटो काटिरहेका यात्रीलाई समय दिँदैनन्, बरु कान फुट्ने गरी हर्न बजाउँछन्, सवारीको गति नघटाई हुँइिकन्छन् ।

सडक अनुशासन फिटिक्कै नभएका चालकहरूसामु मेटिएको जेब्रा क्रसिङमा बाटो काटिरहेका पैदल यात्रीले कति सुरक्षित महसुस गर्लान् ?पैदलयात्रीलाई बाटो काट्न सहज होस् भनेर काठमाडौं उपत्यकामा विभिन्न चोकमा बनाइएका जेब्रा क्रसिङ पनि अहिले मेटिएर गएका छन् ।

ती मेटिएका जेब्र क्रसमा रंग लगाउन न त संघीय सरकारको चासो छ, न प्रदेश सरकारले नै मतलब गरेको छ। उता सडकका नाममा विवादमा उत्रिने काठमाडौं महानगरपालिका र सडक विभागले पनि पैदल यात्रुको सुरक्षामा चासो दिएका छैनन् । ट्राफिक प्रहरी महाशाखा पनि चिट काट्न व्यस्त छ ।

जेब्राक्रस सडक पार गर्न बनाइने महत्त्वपूर्ण संकेत हो, जहाँबाट पैदल यात्रीले सुरक्षित रूपमा हिँड्न पाउँछन् । तर तिनै जेब्रा क्रसिङको संकेत अहिले काठमाडौंको सडकमा भेट्न मुश्किल छ ।

काठमाडौंको प्रमुख पर्यटकीयस्थल, प्रमुख व्यापारिक केन्द्र न्यूरोड, दरबारमार्ग र रत्नपार्क क्षेत्रका सडकहरूबाट अहिले जेब्रा क्रसिङ गायब भएका छन् । त्यहीकारण मेटिएको जेब्रा क्रसिङबाट जोखिम मोल्दै पैदल यात्रुले बाटो काट्नु पर्ने अवस्था आएको छ ।