काठमाडौं। प्रधानमन्त्री केपी शर्मा ओलीको औपचारिक ४ दिने चीन भ्रमणको तयारी पूरा भएको बेइजिङस्थित नेपाली राजदूत कृष्णप्रसाद ओलीले बताएका छन्।
राजदूत ओलीले प्रधानमन्त्री ओली सोमबार दिउँसो बेइजिङ उत्रने र त्यसपछि मंगलबार द्विपक्षीय भेटघाटमा व्यस्त रहने न्यूजगृहुँगको कुराकानीमा जनाए।
साथै राजदूतले ओलीले चिनियाँ राष्ट्रपति सी चिनफिङसँग प्रधानमन्त्री ओलीको भेटघाटको समय तय भइसकेको जानकारी दिए। दुवै मुलुकले द्विपक्षीय भेटवार्ताको आवश्यक गृहकार्य गरिसकेको उनले बताए। उनका अनुसार वार्ताका एजेन्डासमेत तयार भइसकेको छ।
परराष्ट्रमन्त्री आरजु राणाले पनि शुक्रबारै नेपाल सरकारको प्रस्तावबारे चिनियाँ अधिकारीलाई जानकारी गराइसकेकी छन्। चिनियाँ पक्षसँग अनौपचारिक तहमा छलफल गरेरै मस्यौदा तयार गरिएको र त्यसमा सकारात्मक प्रतिक्रिया पनि आएको नेताहरूको भनाइ छ।
प्रधानमन्त्री ओलीको चीन भ्रमणका क्रममा उक्त मस्यौदामा हस्ताक्षर हुने सम्भावना छ। प्रधानमन्त्री ओलीको भ्रमणको पूर्वतयारीका लागि परराष्ट्रमन्त्री राणा छेन्दु पुगेर चिनियाँ समकक्षी वाङ यीलाई भेटेर नेपाल फर्किइसकेकी छिन्। भेटमा सहभागी राजदूत ओली त्यसपछि बेइजिङ पुगेर भ्रमणको चाँजोपाँजो मिलाउने काममा व्यस्त छन्।
परराष्ट्रमन्त्री राणाले नेपालमा बीआरआई परियोजना दुवै देशको सहमतिमै अघि बढ्ने बताएकी छन्। बीआरआईअन्तर्गत सञ्चालन हुने परियोजनामा नेपाल सरकारले अनुदान मात्रै लिने सत्तारूढ दुई दलको साझा धारणा बनिसकेको छ। बीआरआई परियोजनामा ऋण नलिने नीति उनीहरूले बनाएका हुन्।
बीआरआई सहकार्य फ्रेमवर्ककै मस्यौदामा नेपालले पूर्वाधार, सहरी विकास र कनेक्टिभिटीसँग सम्बन्धित एक दर्जन परियोजनाको सूचीसमेत राखिएको छ।
नेपाल पक्षले बीआरआईका लागि टोखा–खहरे सुरुङमार्ग, हिल्सा–सिमकोट सडक, किमाथांका–खाँदबारी सडक र पुल, जिलोङ–केरुङ–काठमाडौं सीमापार रेलमार्ग, काठमाडौं–हेटौंडा पोडवे, अमरगढी सिटी हल, जिलोङ–केरुङ–रसुवागढी चिलिमे २२० केभी सीमापार प्रसारण लाइन, काठमाडौं उपत्यका प्रसारण लाइन स्तरोन्नति, मदन भण्डारी विश्वविद्यालय, काठमाडौं साइन्टिफिक सेन्टर एन्ड साइन्स म्युजियम, चीन–नेपाल औद्योगिक मित्रपार्क र झापा स्पोर्ट्स एन्ड एथलेक्टिस कम्प्लेक्स परियोजना अघि सार्न लागेको हो।
नेपाल र चीनबीच बीआरआईसम्बन्धी समझदारीपत्रमा सन् २०१७ मै हस्ताक्षर भए पनि नेपालमा त्यसअन्तर्गत कुनै परियोजना सुरु भएको छैन। परियोजना सञ्चालनका लागि केही वर्षयता चीनले कार्यान्वयन योजना सम्झौता गर्नुपर्ने सर्त राख्दै आएको थियो। सहकार्य फ्रेमवर्कमा हस्ताक्षर भए नेपालमा बीआरआई परियोजना सञ्चालनको ढोका खुल्नेछ।
