काठमाडौं। नेपाल प्रिमियर लिग (एनपीएल) अन्तर्गत आजको दोस्रो खेलमा काठमाडौं गुर्खाज विजयी भएको छ । लुम्बिनी लायन्सलाई १८ रनले हराउँदै काठमाडौं विजयी भएको हो ।
टस जितेर पहिले ब्याटिङ गरेको काठमाडौंले १९ ओभर दुई बलमा आफ्नो सबै विकेट गुमाउँदै १०३ रन मात्र बनाएको थियो । काठमाडौंका लागि ओपनर स्टिफन स्किनाजीले १३ रन बनाए । अर्का ओपनर माइकल लेभिट शून्य रनमै आउट भए । भीम सार्कीले ३१ रन बनाउँदा ड्यान डथवेटले २१ र प्रतीक श्रेष्ठले २० रन बनाए । अन्य खेलाडीले दोहोरो अंकमा रन बनाएनन् ।
बलिङतर्फ लुम्बिनीका साद जाफरले तीन विकेट लिए । अभिशेष गौतम र रामोन सिमोन्ड्सले समान दुई विकेट लिए । सूर्य तामाङ र विवेक यादवले एक–एक विकेट लिए ।
सानो विजयी लक्ष्य बोकेर जवाफी ब्याटिङमा उत्रिएका लुम्बिनीका ओपनरद्वय आशुतोष घिरैया र अर्जुन साउद क्रमशः चार र तीन रनमा पभेलियन फर्किए । उन्मुक्त चन्द १४ रन बनाएर आउट भए । सन्दीप जोराले सर्वाधिक २६ रनको योगदान दिए । लुम्बिनी १९ ओभर दुई बलमा ८५ रनमा समेटियो ।
बलिङतर्फ काठमाडौंका कप्तान करण केसीले चार विकेट लिए । दीपेश कँडेलले तीन तथा जेरार्ड एरास्मसले दुई र राशीद खानले एक विकेट लिए ।
यो हारसँगै लुम्बिनी लायन्स जारी प्रतियोगिताको लिग चरणबाटै बाहिरिएको छ ।
