काठमाण्डौमा सवारी धनी दर्ता किताब (ब्लुबुक)मा कीर्ते गर्ने केही व्यक्तिहरूको समूह सक्रिय रहेकोले अपरिचितलाई ब्लुबुक नदिन नेपाल प्रहरीले आग्रह गरेको छ । वास्तविक सवारी धनीको ब्लुबुकमा आफूखुशी विवरण भरेर जाली काम गर्ने गिरोहलाई नियन्त्रणमा लिएको जनाउँदै त्यसतर्फ सचेत हुन प्रहरीले अनुरोध गरेको हो । प्रहरीको काठमाण्डौ उपत्यका अपराध अनुसन्धान कार्यालयले हिजो सूचना निकालेर आफ्नो सवारी साधन र सवारी दर्ता किताब अर्कोलाई जिम्मा दिँदा सचेत रहन अनुरोध गरेको हो । पछिल्लो समय ब्लुबुक कीर्ते गरेर गाडी बेचेको अभियोगमा चार जनालाई पक्राउ गरेर कारबाही थालिएको जिल्ला प्रहरी कार्यालयका प्रहरी उपरीक्षक अङ्गुर जिसीले बताउनुभयो । असार ३ गते बैतडीका ३८ वर्षीय वीरेन्द्रसिंह साउद चावहिलबाट दुई थान कीर्ते ब्लुबुकसहित पक्राउ परेका थिए ।