काठमाडौं। नेकपा एमालेले आफ्ना कार्यकर्ताहरुलाई स्मार्ट मोबाइलबाट सामाजिक सञ्जाल चलाउन अभ्यस्त बनाउने भएको छ ।

विपक्षीहरुले सामाजिक सञ्जालको प्रयोग गरेर एमालेमाथि गर्ने आलोचना र गालीको प्रतिवादका लागि कार्यकर्तालाई ‘स्मार्ट’ बनाउने उद्देश्यले पार्टीले फेसबुक चलाउन सिकाउने भएको हो ।

सामाजिक चलाउन सिकेका कार्यकर्ताले पार्टीको कमी कमजोरीबारे भने सार्वजनिक रुपमा अभिव्यक्ति दिन पाउने छैनन् । त्यसो गरेको खण्डमा उनीहरुमाथि कारबाही गरिने चेतावनीसमेत एमाले हेडक्वार्टरले दिएको छ ।

पछिल्लो समय एमालेविरुद्ध घेराबन्दी भएको, नेताहरुको चरित्र हत्या गरिएको र साइबर हमलाको शिकार हुनुपरेको भन्दै एमाले अध्यक्ष एवं प्रधानमन्त्री केपी शर्मा ओलीले चिन्ता व्यक्त गरेका छन् । यसको प्रतिवादका लागि कार्यकर्तालाई स्मार्ट बनाइनुपर्ने उनको निर्देशन छ ।

एमाले संगठन विभागका प्रमुख काशीनाथ अधिकारीले वडास्तरीय अभियानका लागि तयार पारेको प्रस्तावमा ‘साइबर हमलाको प्रतिवाद गर्ने’ भनिएको छ । मंगलबार सम्पन्न केन्द्रीय कमिटी बैठकले पारित गरेको यो अभियान एमालेले देशभैरिका वडा तहसम्म चलाउने भएको छ ।

प्रस्तावको बुँदा नम्बर ७ मा ‘साइबर हमलाको प्रतिवाद गर्ने काम’ उपशीर्षकमा भनिएको छ, ‘आ–आफ्नो मोबाइलबाट पार्टीको सकारात्मक प्रचार कार्यमा जुट्न (प्रचारको स्मार्ट शैली अपनाउन) सम्पूर्ण सदस्यलाई अभ्यस्त गराउने । सामाजिक सञ्जालको सही उपयोगको महत्वबारे प्रशिक्षित गर्ने ।’

एमालेले भनेको छ, ‘साइबर हमलाको सशक्त र प्रभावकारी प्रतिवादका लागि सदस्यहरुलाई सम्पूर्णरुपले अनलाइनमा लैजानु आवश्यक छ ।’

एमालेको वडा अभियानसम्बन्धी प्रस्तावमा भनिएको छ, ‘पार्टीको नीति र नेतृत्वका विरुद्ध भैरहेको घेराबन्दी, षड्यन्त्र र फैलाइएका एक–एक भ्रमहरूको जमेर प्रतिवाद गर्ने । तथ्य आधारित तर्कपूर्ण प्रश्नहरू व्यापक गर्ने ।’

तर, पार्टीको मोबाइलमा सामाजिक सञ्जाल चलाउन अभ्यस्त बनाइएका एमाले कार्यकर्ताले आफ्नो पार्टीको नीति र नेताका सन्दर्भमा टिप्पणी गरेको खण्डमा भने उनीहरुमाथि कारवाही हुनेछ ।

एमालेको वडा अभियानको प्रस्तावमा भनिएको छ, ‘लहै–लहैमा लागेर कुनै सदस्यले पार्टीको नीति र नेतृत्वका बारेमा अनास्था जाग्ने कुरा सामाजिक सञ्जालमा पस्कनु अराजकता हुन जान्छ । त्यसलाई वडा तथा टोल कमिटीले गम्भीर रुपले लिने र विषयको गम्भीरता हेरी कार्वाहीको विषय बनाउने ।’