वार्सा (बेलारुस) । बेलारुसका राष्ट्रपति अलेक्जेन्डर लुकासेन्कोले शनिबार ३३ राजनीतिक बन्दीलाई आममाफी दिने निर्णय गरेका छन् । आलोचक, पश्चिमा र स्वतन्त्र अधिकारवादी समूहले उनका एकपक्षीय कामविरुद्ध प्रदर्शनबाहेक अरू केही नगरेपछि सन् १९९४ देखि सत्तामा रहेका नेता लुकासेन्कोले आउँदो सप्ताहन्तमा आफ्नो शासन लम्ब्याउने कसरत गरिरहेका समय यो निर्णय आएको हो ।

लुकासेन्को र बेलारुसको दंगा प्रहरीले सन् २०२० मा राष्ट्रपतीय चुनावमा धाँधली भएको भन्दै सडकमा उत्रिएका दशौँ हजार प्रदर्शनकारीमाथि कडा कारबाही गरेको थियो । अधिकारवादी समूहका अनुसार, २०२० मा लुकासेन्कोका विरोधी र प्रदर्शनकारी नेतासहित एक हजारभन्दा बढी राजनीतिक बन्दीलाई पक्राउ गरिएको थियो ।

शनिबार उनले तीन महिला र ३० पुरुष गरी ३३ जनालाई माफी दिएका हुन् । उनीहरूलाई ‘अतिवादी गतिविधि’ गरेको अभियोगमा जेल सजाय सुनाइएको थियो ।

जनवरी २६ मा हुन लागेको मतदानका दौरानमा आफूलाई उदारवादी नेता पुष्टि गर्न उनले विगत ६ महिनामा २०० भन्दा बढी व्यक्तिहरूलाई क्षमादान दिई रिहा गर्ने आदेश गरेका छन् ।

लुकासेन्कोले निर्वाचनमा कुनै वास्तविक प्रतिस्पर्धाको सामना गर्नुपर्ने छैन । गत हप्ता एक कारखानाको भ्रमणका क्रममा उनले बहस सञ्चालन गर्नुको कुनै अर्थ नदेखेको र वास्तवमा चुनावी अभियानलाई पछ्याइरहेको बताएका थिए ।

शनिबारको क्षमादानमा रिहा भएकाहरूको पहिचान सार्वजनिक गरिएको छैन । तीमध्ये कोही पनि देशको विपक्षमा रहेका प्रमुख व्यक्तिहरू हुन् वा होइनन् भन्ने स्पष्ट भएको छैन ।

राजनीतिक कैदीहरूलाई कठिन परिस्थितिमा राखिएको छ । उनीहरूलाई प्रायः वकिलहरूको पहुँच वा बाहिरका आफन्तसँग सम्पर्क गर्न दिइँदैन । रासस/एएफपी