जनकपुरधाम। नेपालको तराई क्षेत्र विशेष गरी धनुषा जिल्लामा चिसोको कारण जनजीवन थप कष्टकर बनेको छ । मौसममा आएको अचानकको परिवर्तनले चिसो अत्यधिक बढेपछि सर्वसाधारणलाई राहत प्रदान गर्न धनुषा ट्राफिक प्रहरीले विशेष अभियान सुरु गरेको छ ।
जिल्ला प्रहरी कार्यालय धनुषाको समन्वयमा जिल्ला ट्राफिक प्रहरी कार्यालयले चिसोबाट प्रभावित जनतालाई न्यानो प्रदान गर्ने उद्देश्यले विभिन्न स्थानमा दाउरा बाँड्ने कार्य सुरु गरेको छ ।
धनुषा जिल्लामा ट्राफिक चेकपोस्टहरूमा बसेका सर्वसाधारणलाई विशेष ध्यान दिँदै ट्राफिक प्रमुख हरि बहादुर वलीले दाउरा उपलब्ध गराएर आगो बाल्ने व्यवस्था मिलाएका छन् । अत्यधिक चिसोका कारण विशेष गरी मोटरसाइकल र साइकलमा यात्रा गर्ने सर्वसाधारणलाई बढी असर परिरहेकोले उनीहरूलाई चिसोबाट बचाउनका लागि ट्राफिक प्रहरीले न्यानोको व्यवस्था गर्दै आएको छ ।
यस अभियान अन्तर्गत जिल्लाका मुख्य सडकहरूमा र विभिन्न ट्राफिक चेकपोस्टहरूमा सवारी साधन चालक र यात्रुहरूलाई केही बेर बस्न र न्यानो ताप्न आग्रह गरिएको छ ।
धनुषा जिल्लामा मात्रै नभएर सम्पूर्ण तराई क्षेत्रमा चिसोको प्रभावले जनजीवन अस्तव्यस्त भएको छ । बाक्लो हुस्सु र कुहिरोले गर्दा घाम नलागेपछि चिसो अझ बढी महसुस गरिएको छ । चिसोका कारण विद्यालय, कार्यालय र अन्य दैनिक गतिविधिहरू प्रभावित भएका छन् ।विशेष गरी वृद्ध वृद्धा, बालबालिका र अशक्त व्यक्तिहरूलाई चिसोले निकै कष्ट दिएको छ ।
धनुषा ट्राफिक प्रहरीको यो कदमले चिसोबाट पीडित जनतालाई राहत दिने उद्देश्य राखेको बताउँदै सर्वसाधारणलाई यस कठिन परिस्थितिमा सहयोग गर्न आफूहरू सदैव तयार रहेको ट्राफिक प्रमुख वलीले बताए । उनका अनुसार यस अभियानले सर्वसाधारणलाई केही राहत दिनेछ र उनीहरूको स्वास्थ्यलाई चिसोबाट जोगाउन मद्दत पु¥याउनेछ ।
प्राकृतिक कारणले आएको यो प्रतिकूल मौसमले तराईका जनतालाई निकै कठिनाइ भएको छ ।
