काठमाडौं। पश्चिम नेपालमा राजनीतिक दौडाहामा निस्किएका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ सशस्त्र द्वन्द्वका क्रममा ज्यान गुमाएका कार्यकर्ताको परिवार भेटघाट गरिरहेका छन् ।
उनले शुक्रबार दाङको तुलसीपुर–८ बटोलपुरका भगवती चौधरीको घर पुगेका छन् । तत्कालीन नेकपा माओवादीले नेतृत्व गरेको सशस्त्र द्वन्द्वका क्रममा चौधरीको परिवारका ६ जना राज्य पक्षबाट मारिएका थिए ।
‘नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’सहितका नेताहरू दाङको तुलसीपुर–८ बटोलपुरस्थित भगवती चौधरीको घरमा,’ पूर्वप्रधानमन्त्रीसमेत रहेका प्रचण्डको सचिवालयले भनेको छ, ‘सो क्रममा अध्यक्ष प्रचण्डसहित नेताहरूले सहिद परिवारले तयार गरेको थारु समुदायको परिकारसहित खाना खानुभएको थियो । जनयुद्धकालमा चौधरीको परिवारले छ जना सदस्य गुमाएको थियो ।’
अध्यक्ष प्रचण्ड बिहीबार बाँकेको खजुरा–३ धवलागिरी गाउँमा सहिद डम्बर रानाभाटको घरमा पुगेका थिए । उनले त्यस क्षेत्रका अन्य सहिद परिवारसँग पनि भेट गरेका थिए ।
प्रचण्डले सहिद परिवारसँगको भेटमा सहिदहरू कहिल्यै नमर्ने उल्लेख गर्दै सहिद परिवारको दुःख पीडाको साथी पार्टी भएको बताएका थिए ।
आफू तेस्रो पटक प्रधानमन्त्री भएको बेला ‘जनयुद्ध’का सबै सहिदलाई राष्ट्रिय सहिद घोषणा गरिएको जानकारी दिँदै उनले सहिद तथा बेपत्ता परिवारको सम्मान राज्यले गर्ने बताएका थिए ।
अध्यक्ष प्रचण्डले शुक्रबार दाङको तुलसीपुरस्थित अरनिको मैदानमा हुने पार्टीको नगर अधिवेशन उद्घाटन तथा खबरदारी सभालाई सम्बोधन गर्ने कार्यक्रम रहेको सचिवालयले जनाएको छ ।
सचिवालयकाअनुसार तुलसीपुरको सभापछि प्रचण्डले सहिदस्मृति आवासीय मावि पुगेर सहिद सन्ततिसँग भेटघाट गर्ने र साझ घोराहीमा उद्योगी व्यापारीसँगको भेटघाट गर्ने कार्यक्रम रहेको छ ।
अध्यक्ष प्रचण्ड शनिबार घोराही र देउखुरीमा आयोजना हुने कार्यक्रमलाई सम्बोधन गरेर संघीय राजधानी काठमाडौं फर्किन कार्यक्रम छ ।
