काठमाडौं। भारतको महाराष्ट्रमा भएको रेल दुर्घटनामा ज्यान गुमाएका नेपाली नागरिकहरूको सनाखत भएको छ ।
परराष्ट्र मन्त्रालयले प्रेस विज्ञप्ति जारी गर्दै माघ ९ गते भएको रेल दुर्घटनामा ज्यान गुमाएका सात जना नेपाली नागरिकको सनाखत भएको जानकारी दिएको हो ।
मन्त्रालयका अनुसार; दुर्घटनामा परी कैलालीका ४३ वर्षीया कमला नवीन भण्डारी र ४० वर्षीय लछिराम पासी, अछाम मंगलसेनका ११ वर्षीय हिमु नन्दराम विश्वकर्मा, ४४ वर्षीय नन्दराम पद्म विश्वकर्मा, ४२ वर्षीया मैसारा कामी विश्वकर्मा, अछामकै कमलबजारकी ६० वर्षीया जोक्ला उर्फ कला कामी र डन्डुवा बाँकेका राधेश्याम राधको ज्यान गएको हो ।
माघ ९ गते साँझ करिब ५ बजेर ५ मिनेट जाँदा भारतको महाराष्ट्र राज्यमा पर्ने जलगाउँ जिल्लाको परधाडे स्टेसननजिकै रेल दुर्घटना हुँदा सात जना नेपालीसहित १२ जनाको मृत्यु भएको थियो ।
दुर्घटनामा मृत्यु भएका नेपालीहरूको शव नेपाल ल्याउन र घाइतेहरूको शीघ्र उपचार गर्न नयाँ दिल्लीस्थित नेपाली राजदूतावास तथा काठमाडौंस्थित भारतीय राजदूतावासमार्फत् भारत सरकारका सम्बन्धित निकायहरूसँग समन्वय तथा सहजीकरण गरिरहेको मन्त्रालयले जनाएको छ ।
दुर्घटनामा घाइते भएका चार जना नेपालीमध्ये तीन जनाको स्थानीय अस्पताल र गम्भीर घाइते भएका एक जनाको गोदावरी अस्पताल, जलगाउँमा उपचार भइरहेको मन्त्रालयले जनाएको छ ।
