काठमाडौं। ओखलढुंगा, मानेभञ्ज्याङ गाउँपालिका–७ स्थित सडकमा खोटाङबाट काठमाडौंतर्फ जाँदै गरेको ना.१ ज ६४२१ नम्बरको सुमो गए राति दुर्घटना हुँदा सुमोमा सवार ३ जनाको मृत्यु भएको छ ।

दुर्घटनामा खोटाङ केपिलासगढी गाउँपालिका–३ बस्ने ५६ वर्षीया माया देवी गुरूङ, उनकै छोरा २८ वर्षीय पुजन गुरूङ र खोटाङ दिक्तेल रूपाकोट मझुवागढी नगरपालिका–१२ बस्ने ४५ वर्षीया तारा गुरूङको मृत्यु भएको हो ।

हाल फरार सुमो चालकको प्रहरीले खोजी गरिरहेको छ ।

अछाम, कमलबजार नगरपालिका–१ मोटरकाट्या कमलबजार तुर्माखांदस्थित सडकमा कमलबजारबाट तुर्माखांदतर्फ जाँदै गरेको सु.प.प्र.०१००८ प ४०३ नम्बरको मोटरसाइकलको ठक्करबाट पैदलयात्री सोही नगरपालिका–१ मुली बस्ने ७२ वर्षीया मैसरा ढकालको बिहीबार दिउँसो घटनास्थलमै मृत्यु भएको छ । मोटरसाइकल चालकलाई प्रहरीले नियन्त्रणमा लिएको छ ।

सुर्खेत, भेरीगंगा नगरपालिका–३ सतरीस्थित सडकमा ना.४ ख ६२६३ नम्बरको बस र क.प्र.०२००१ क ००४८ नम्बरको मिनी ट्रक एकआपसमा ठक्कर खाई बिहीबार दिउँसो दुर्घटना हुँदा ट्रक चालक दैलेख गुँरास गाउँपालिका–१ बस्ने ३१ वर्षीय हिरा पुन मगरको मृत्यु भएको छ । दुर्घटनामा गम्भीर घाइते भएका उनको कर्णाली प्रदेश अस्पताल कालागाउँमा उपचारको क्रममा मृत्यु भएको हो ।

साथै दुर्घटनामा घाइते भएका अन्य ६ जनाको सोही अस्पतालमा उपचार भइरहेको नेपाल प्रहरी केन्द्रीय कार्यालयले जनाएको छ ।