खोटाङ । ऐसेलुखर्क गाउँपालिकाको सेवा प्रवाह आफ्नै प्रशासकीय भवनबाट सुरुआत गरिएको छ। स्थापना भएदेखि हालसम्म स्थानीयवासीको भाडाको घरमा सञ्चालन हुँदै आएको यो गाउँपालिकाले शुक्रबारदेखि औपचारिक रूपमा आफ्नै प्रशासकीय भवनबाट सेवा प्रवाह थालनी गरेको हो।

वार्षिक करकट्टीसहित रु चार लाख ६८ हजार भाडा तिरेर कार्यालय सञ्चालन गर्दै आएको गाउँपालिकाले आफ्नै प्रशासकीय भवनबाट सेवा प्रवाह सुरु गरेपछि नागरिकलाई सेवा लिन समेत सहज भएको छ। विसं २०८१ वैशाख मसान्तभित्र सम्पन्न गर्नेगरी ठेकेदार कम्पनीसँग सम्झौता गरिएको प्रशासकीय भवन एक वर्षपछि रु दुई करोड ३० लाख लागतमा निर्माण सम्पन्न भएको गाउँपालिकाका लेखा शाखा प्रमुख पंकज आचार्यले जानकारी दिए।

निर्माण सुरु गरेको पाँच वर्ष दुई महिनापछि सम्पन्न भएको प्रशासकीय भवन शुक्रबार गाउँपालिका प्रमुख गीरेन्द्र बहादुर राईले औपचारिक रूपमा उद्घाटन गरेर सेवा प्रवाहको शुभारम्भ गरे। ठेकेदार कम्पनीले निर्माण सम्पन्न गरेर भर्खरै गाउँपालिकालाई हस्तान्तरण गरेको १४ कोठे दुईतले प्रशासकीय भवनको अन्तिम तलामा फलामे ट्रससहित जस्तापाताको छाना हालिएको छ।

सो अवसरमा अध्यक्ष राईले ढिलै भए पनि गाउँपालिकाको आफ्नै प्रशासकीय भवनबाट सेवा प्रवाह गरिएसँगै आर्थिक भारबाट जोगिएको जानकारी दिए। ‘प्रशासकीय भवन निर्माणमा निकै झमेला खेप्नुपर्‍यो। सुरुको स्टिमेट फेरबदल गरेर पुनः अर्को स्टिमेटअनुसार भवन निर्माण गरिएको छ,’ उनले भने, ‘ठेकेदारको लापरबाहीले आरसिसी ढलानसहितको तीनतले प्रशासकीय भवनलाई दुई तलामा सीमित गर्न बाध्य भयौं। ढिलै भए पनि गाउँपालिकाको आफ्नै प्रशासकीय भवन सञ्चालनमा ल्याएका छौँ। भाडाको घरबाट आफ्नै प्रशासकीय भवनमा सरेर सेवा प्रवाह सुरु गरिएसँगै वर्षेनी गाउँपालिकामा थपिने आर्थिक भार समेत जोगिएको छ।’

विसं २०७७ जेठ–१३ गते ठेक्का सम्झौता गरेर निर्माण सुरु गरिएको प्रशासकीय भवन निर्माणमा ठेकेदारको लापरबाहीले सम्पन्न गर्न ढिलाइ भएको गाउँपालिकाले जनाएको छ। निर्माणाधीन अवस्थामा ठेकेदार कम्पनीले नक्कली रिपोर्ट ९प्रतिवेदन० बनाएर पहिलो चरणको रकम भुक्तानीका लागि गाउँपालिकामा बिल बुझाएको खुलेपछि गाउँपालिकाले ठेक्का सम्झौता रद्द गरेको थियो।

विसं २०७७ माघ–१९ गते निर्माण सम्पन्न गरिसक्नुपर्ने सभाहलसहित १६ कोठा भएको तीनतले प्रशासकीय भवन निर्माणका लागि ठेकेदार कम्पनी रुजन–जगदम्बा–भुवनेश्वरी एन्ड वैभव जेभीसँग सम्झौता भएको थियो। प्रदेश सरकार र गाउँपालिकाको संयुक्त लगानीमा निर्माण सुरु गरिएको प्रशासकीय भवनका लागि गाउँपालिकाले रु तीन करोड ६९ लाख ८५ हजार ८७३ को लागत अनुमान गरेको थियो। तर, ठेकेदार कम्पनीले मूल्य अभिवृद्धि करसहित रु दुई करोड ६८ लाख ४३ हजार ३४६ मा निर्माण सम्पन्न गरेर हस्तान्तरण गर्नेगरी सम्झौता गरेको थियो।

सम्झौता गरेको केही महिनापछि ठेकेदार कम्पनीले भवनको पहिलो तला ढलान गरेर दोस्रो तलाका लागि तयारी गरेको थियो। आरसिसी ढलानसहितको प्रशासकीय भवन निर्माणमा ठेकेदारको लापरबाही देखिएपछि गाउँपालिकाले ठेक्का सम्झौता रद्द गरेसँगै भवन निर्माणको काम अलपत्र बनेको थियो।

ललितपुरस्थित गुणस्तर अनुसन्धान तथा विकास केन्द्रले प्रशासकीय भवनको संरचना निर्माणका क्रममा ठेकेदार कम्पनीले सम्झौताअनुसारको गुणस्तर कायम नगरेको औँल्याएपछि गाउँपालिकाले ठेक्का सम्झौता रद्द गरेको गाउँपालिकाका प्रवक्ता एवम् वडा नं ३ ऐसेलुखर्कका वडाध्यक्ष टेकेन्द्र राजभण्डारीले जानकारी दिए। गाउँपालिकाले पत्राचार गर्नुअघि नै निर्माण व्यवसायीले निर्माणाधीन प्रशासकीय भवनको पहिलो तलाको स्ल्याब ढलान गरिसकेका थिए।

ठेकेदार कम्पनीसँगको सम्झौता रद्द गरिएपछि निर्माणाधीन अवस्थामै अलपत्र परेको प्रशासकीय भवन सम्पन्न गर्नका लागि नेपाल मध्यस्थता परिषद्मा भएको पटक-पटकको छलफलपछि विसं २०८० पुस–४ गते पुनः सम्झौता गरेर अगाडि बढ्नेगरी दुई पक्षीय सहमति भएको थियो। सहमतिअनुसार विसं २०८० फागुन–१० गते पुनः सम्झौता गरेर निर्माणको काम सुरु गरिएको थियो।