काठमाडौं । प्रमुख प्रतिपक्षी दल नेकपा (माओवादी केन्द्र) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ले प्रतिनिधिसभाको बैठकमा वर्तमान सरकारप्रति गम्भीर आक्रोश व्यक्त गर्दै सरकारको कार्यशैलीलाई दलाल–बिचौलियाको निर्देशनमा चल्ने भन्दै तीव्र आलोचना गरेका छन्।
प्रचण्डले सोमबार संसदमा विशेष सम्बोधन गर्दै सत्ता गठबन्धनलाई अप्राकृतिक भन्दै यसको चरित्र “लोकले नै लाज मान्ने गरी उजागर भएको” दाबी गरे। उनले भने, “सरकार बनाउने क्रममा देखाइएको तर्कभन्दा पछाडि रहेको स्वार्थ आज जनतासामु प्रस्ट खुलिसकेको छ।”
उनले देश बहुआयामिक संकटको संघारमा रहेको उल्लेख गर्दै शान्ति सम्झौता, संविधान निर्माणका बखत जनतासँग गरिएको सपना र प्रतिवद्धता आज अपमानित अवस्थामा पुगेको बताए। “के हामी वास्तवमै शान्ति सम्झौताको मार्गमा अघि बढिरहेका छौं ?” भन्ने प्रश्न गर्दै उनले भ्रष्टाचार, अराजकता र बेथिति मौलाएको टिप्पणी गरे।
धितोपत्र बोर्डदेखि भुटानी शरणार्थी काण्ड, विद्युत् बक्यौता मिनाहा, भूमाफिया संरक्षण र सरुवा–नियुक्तिमा हुने लेनदेनजस्ता घटनाहरूको उल्लेख गर्दै उनले राज्यको नियामक संरचनामाथि बिचौलियाको प्रभाव बढेको गम्भीर आरोप लगाए। प्रचण्डले सरकार सुशासनको पूर्ण पतनतर्फ उन्मुखू भएको बताउँदै, ूयो लोकतन्त्रकै मूल आत्मामाथि खतरा हो, भने।
उनको आरोप अनुसार वर्तमान सरकारले न जनताको विश्वास जित्न सकेको छ, न नै सत्तारूढ दलकै कार्यकर्ता सन्तुष्ट छन्। “शिक्षक, राष्ट्रसेवक, चिकित्सक आन्दोलनमा छन्। सहकारी पीडित र मिटरब्याज समस्याले जनजीवन गाँजेको छ,” भन्दै उनले प्रधानमन्त्री ओलीलाई प्रश्न गरे, “तपाईंले यो एक वर्षमा कसको विश्वास जित्नुभयो ?”
उनले सरकारसँग अब पनि नैतिक बल बाँकी छ कि छैन भन्ने विषयमा जनतामाझ प्रश्न खडा भएको स्पष्ट पारे। साथै, सुशासन, सामाजिक न्याय र आर्थिक समृद्धिको मार्गमा सरकार गम्भीरतापूर्वक लाग्नुपर्ने चेतावनी दिए। निष्कर्षमा, प्रचण्डको सम्बोधनले संसदमा सत्ता गठबन्धनविरुद्धको असन्तुष्टि अझ चर्काउने संकेत दिएको छ। अब सत्तापक्षको जवाफ कस्तो आउनेछ भन्नेमा राजनीतिक वृत्तको ध्यान केन्द्रित छ।
