काठमाडौँ। राष्ट्रपति रामचन्द्र पौडेलले राष्ट्रिय बाल दिवसका अवसरमा शुभकामना व्यक्त गर्दै बालबालिकाको अधिकार र विकासमा सबै पक्षले ध्यान दिनुपर्ने बताएका छन्।

नेपालले बालअधिकारसम्बन्धी महासन्धी अनुमोदन गरेको दिनलाई आधार मानी हरेक वर्ष भदौ २९ गते बाल दिवस मनाइँदै आएको छ। यस वर्षको नारा ‘बालबालिकामा लगानीः सुनिश्चित भविष्यको थालनी’ रहेको छ।

राष्ट्रपति पौडेलले सन्देशमा संविधानले बालबालिकाको हक सुनिश्चित गरेको उल्लेख गर्दै शिक्षा, स्वास्थ्य, सुरक्षा र विकासमा आवश्यक लगानी गर्नुपर्ने बताए। उनले अझै पनि केही बालबालिका अधिकारबाट वञ्चित रहेको भन्दै बालमाथि हुने हिंसा, दुव्र्यवहार र अमानवीय व्यवहार रोक्न सरोकारवालाको दायित्व रहेको उल्लेख गरे।

उनले सृजनात्मक, व्यावहारिक, निःशुल्क तथा गुणस्तरीय शिक्षा, पोषणयुक्त आहार, सुरक्षित खानेपानी, सरसफाइ, खोप र बालमैत्री स्वास्थ्य सेवाको सुनिश्चितता आवश्यक भएको बताए। साथै, घर, विद्यालय र समुदायमा सुरक्षित वातावरण सिर्जना गरी सबै बालबालिकालाई समान अवसर उपलब्ध गराउन दिवसले प्रेरणा दिने विश्वास व्यक्त गरे।