काठमाडौं । भारतको प्रयागराजमा जारी कुम्भ मेलाको समापन हुनुअघि संगम क्षेत्रमा गंगा र यमुनाको पानीको शुद्धताबारे दुईवटा विवादास्पद रिपोर्ट सार्वजनिक भएका छन्। यसले नयाँ विवादलाई जन्म दिएको छ।
भारतको केन्द्रीय प्रदूषण नियन्त्रण बोर्ड (सीपीसीबी)ले ३ फेब्रुअरीमा राष्ट्रिय हरित न्यायाधीकरण (एनजीटी)मा प्रस्तुत गरेको रिपोर्टमा गंगा र यमुनाको पानीमा निर्धारित मापदण्डभन्दा धेरै गुणा बढी फेकल कोलिफर्म ब्याक्टेरिया भएको उल्लेख गरिएको थियो। यसपछि, १८ फेब्रुअरीमा उत्तर प्रदेश प्रदूषण नियन्त्रण बोर्ड (यूपीपीसीबी)ले एनजीटीलाई नयाँ रिपोर्ट पेस गर्यो, जसमा सीपीसीबीको रिपोर्ट अस्वीकार गरिएको थियो।
एनजीटीले यस मुद्दामा कडा टिप्पणी गर्दै यूपीपीसीबीबाट पुनः नयाँ रिपोर्ट माग गरेको छ। यो मुद्दाको अर्को सुनुवाई २८ फेब्रुअरीमा हुने तय गरिएको छ, जबकि कुम्भ मेला २६ फेब्रुअरीमा समाप्त हुनेछ।
प्रयागराजमा माघ १३ गतेदेखि महाकुम्भ स्नान भइरहेको छ र उत्तर प्रदेश सरकारले जारी गरेको तथ्यांकअनुसार, अहिलेसम्म ५८ करोड मानिसले संगममा स्नान गरेका छन्।
