काठमाडौं। नेकपा (एमाले)का सचिव एवं प्रतिनिधि सभाका सदस्य योगेश भट्टराईले ‘कुलिङ अफ पिरियड’का बारेमा नेकपा (माओवादी केन्द्र)का अध्यक्ष पुष्पकमल दाहाल प्रचण्डलाई नै छानबिनको दायरामा ल्याउनुपर्ने बताएका छन् ।
दाहालले हिजो एउटा कार्यक्रममा यस विषयमा प्रधानमन्त्री केपी शर्मा ओलीमाथि छानबिन गर्नुपर्ने अभिव्यक्ति दिएपछि त्यसको कडा प्रतिवाद गर्दै भट्टराईले दाहाल छानबिनको दायरामा आउनु पर्ने आधार समेत प्रस्तुत गरेका हुन् ।
दाहाललाई सम्बोधन गर्दै भट्टराईले संघीय निजामति सेवा गठन, सञ्चालन र सेवाका शर्त सम्बन्धमा व्यवस्थ गर्न बनेको विधेयकमा कुलिङ अफ पिरियडका बारेमा प्रधानमन्त्री लक्षित अभिव्यक्ति दिएको गम्भीर ध्यानकर्षण भएको भट्टराईले उल्लेख गरे । उनले पूर्वप्रधानमन्त्री समेत रहेका दाहाल यस प्रकरणमा तीन वटा कारणले दाहालमाथि छानबिन गर्न माग गरे ।
‘२०८० फागुन ११ गते संसदमा यो विधेयक दर्ता भएको बेला तपाईं नै प्रधानमन्त्री हुनुहुन्थ्यो । तपाईंकै अध्यक्षतामा बसेको मन्त्रिपरिषद् बैठकले यो विधेयकलाई संसदमा पेश गर्न स्विकृति दिएको हो’ भट्टराईले लेखेका छन्, ‘जसमा कुलिङ अफ पिरियडको कुनै व्यवस्था गरिएको छैन । यसले स्पष्ट गर्दछ कि तपाईं कुलिङ अफ पिरियडको पक्षमा हुनुहुन्थेन ।’ भट्टराईले दाहाललाई सोधेका छन्, ‘आज विपक्षी बेन्चमा पुगेपछि एकाएक कुलिङ अफ पिरियडको भूत कसरी जाग्यो ?’
दाहाल प्रतिनिधि सभा राज्य व्यवस्थ समितिको वरिष्ठ सदस्य भएको स्मरण गराउँदै भट्टराईलले सोही समितिले कुलिङ अफ पिरियड राख्ने निर्णय गरेको उल्लेख गरे । ‘तर समितिको प्रतिवेदन संसदमा पेश गर्दा यो व्यवस्थलाई किन तलमाथि गरियो ? समितिको वरिष्ठतम् सदस्यका हैसियतले तपाईंमाथि नै नैतिक प्रश्न उठ्छ हैन र ?’ भट्टराईले लेखेका छन्, ‘अनि छानबिन तपाईंमाथि नै गर्नुपर्ने हो कि ?’
भट्टराईले फेसबुकमा लेखेका छन्–
कमरेड पुष्पकमल दाहालज्यू
लालसलाम
तपाईंले सङ्घीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकमा कुलिङ अफ पिरियडका बारेमा प्रम केपी ओलीलाई समेत छानबीन गर्नु पर्ने भनेर मंतव्य दिनु भएकोमा गम्भीर ध्यानाकर्षण भएको छ । निम्न विषयमा तपाईको ध्यानाकर्षण सहित जवाफको अपेक्षा गर्दछु ।
1. हामी विधेयकमा कुलिङ अफ पिरियड समावेश गर्नु पर्छ भन्ने पक्षमा छौ र यो विषयको संशोधन हामीले ( सांसदहरू) नै राखेका हौ । आज पनि हामी यो अड़ानमा कायम छौ ।
2. तपाईंले वर्तमान प्रम केपी ओलीमाथि व्यंग्य गर्नु भएछ । तपाई कुलिङ अफ पिरियडका सम्बन्धमा “प्रचण्ड” अड़ानमा हो भने मेरो प्रश्न छ २०८० फागुन ११ गते संसदमा बिधेयक दर्ता भएको बेला तपाई नै प्रम हुनुहुँथ्यों र तपाई कै अध्यक्षतामा बसेको मंत्रिपरिषदको बैठकले यो विधेयकलाई संसदमा पेस गर्न स्वीकृति दिएको हो । जसमा कुलिङ अफ पिरियडका बारेमा कुनै व्यवस्था गरिएको छैन । यसले स्पष्ट गर्दछ कि तपाई कुलिङ अफ पिरियडका पक्षमा हुनुहुन्थेन । आज विपक्षी बेंचमा पुगेपछि एकाएक कुलिङ अफ पिरियडको भूत कसरी जाग्यो? सांसदहरूको संशोधन प्रस्ताव पछि मात्र यो विषयको बहस शुरु भएको हो । यो तथ्यका बारेमा हेक्का रहोस ।
3. प्रतिनिधिसभाको राज्य ब्यबस्थ तथा सुशासन समितिको तपाईं वरिष्ठतम सदस्य पनि हो । जुन समितिले कुलिङ अफ पिरियड राख़्ने निर्णय गरेको थियो । तर समितिको प्रतिबेदन संसदमा पेश गर्दा यो ब्यवस्थालाई तलमाथि किन गरियो ? समितिको वरिष्ठतम सदस्यका हैसियतले तपाईंमाथि पनि नैतिक प्रश्न उठछ होईंन र? अनि छानबिन त तपाईमाथि नै गर्नु पर्ने हो की? आफनै बोली आफैलाई गलापासो नहोस!
