चन्द्रपुर (रौतहट)।चन्द्रपुर नगरपालिका–२ स्थित जुडिबेला खानेपानी आयोजना सुरु भएको १० वर्ष बित्दा पनि अझै आधा काम मात्र सम्पन्न भएको छ । आयोजनाले स्थानीय दुई हजार ५०० घरपरिवारका करिब १० हजार नागरिकलाई शुद्ध खानेपानी उपलब्ध गराउने लक्ष्य राखिएको भए पनि हालसम्म ५५ प्रतिशत मात्र भौतिक प्रगति भएको छ ।
२०७२ सालदेखि निर्माण थालिएको आयोजनाको ढिलाइका कारण स्थानीय बासिन्दा अझै ३० देखि ५० फिट गहिराइको आर्सनिकयुक्त पानी प्रयोग गर्न बाध्य छन् । उपभोक्ता समिति अध्यक्ष भोला थपलियाका अनुसार आयोजनाको काम न सङ्घीय सरकारको प्राथमिकतामा पर्यो, न प्रदेशको ध्यानाकर्षणमा । हाल करिब दुई सय घरमा मोटरबाट सिधै पानी पठाइए पनि पर्याप्त व्यवस्था छैन ।
समिति सदस्य टेकनाथ खरेलका अनुसार सबै घरमा पानी पुर्याउन झण्डै ३५ किलोमिटर मेनलाइन पाइप आवश्यक छ । वडाध्यक्ष दुत्तबहादुर थिङका अनुसार वडामा हाल दुई हजार ५०० भन्दा बढी घर छन् ।
खानेपानी तथा सरसफाइ डिभिजन कार्यालयका इञ्जिनियर विवेक झाले चार लाख ५० हजार लिटर क्षमताको ओभरहेड ट्याङ्की निर्माण भइसके पनि ठेकेदारलाई रु ५४ लाख भुक्तानी दिन बाँकी रहेको बताए ।
डिपबोरिङ, कार्यालय भवन, पम्पहाउस निर्माण र करिब २७ किलोमिटर पाइप गाड्ने काम सम्पन्न भए पनि बजेट अभावले बाँकी काम रोकिएको छ । आयोजनाका लागि अझै करिब दुई करोड रुपैयाँ आवश्यक रहेको मन्त्रालयलाई बुझाइएको पत्रमा उल्लेख छ ।
