काठमाडौं- परराष्ट्रमन्त्री डा. आरजु राणा देउवाले भारत भ्रमणका क्रममा हवाई रुटबारे सकारात्मक छलफल भएको बताएकी छन् ।
सिंहदरबारमा मंगलबार बसेको प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समिति बैठकमा आफ्नो भारत भ्रमणबारे जानकारी गराउँदै उनले यस्तो बताएकी हुन् ।
‘मैले भारतसँग नयाँ हवाई रुटबारे कुरा राखेकी छु । टेक्निकल टिमको मिटिङ गर्ने सहमति भएको छ’, उनले भनिन्, ‘भैरहवा र महेन्द्रनगर हवाई रुटबारे भारतसँग कुरा भएको छ।’
त्यस्तै उलेन पन्चेश्वरबारेमा सहमति लगभग अन्तिम चरणमा पुगेको बताउँदे अब काम अघि बढाउने कुरा भएको जानकारी दिइन् । नेपाल भारत प्रवुद्ध समूह (इपीजी) ले तयार पारेको प्रतिवेदनबारे कुनै छलफल नभएको भन्दै उनले उपयुक्त समयमा कुरा गर्ने उल्लेख गरेकी छन् ।
त्यस्तै भ्रमणका क्रममा भारतीय प्रधानमन्त्री नरेन्द्र मोदीसँग भेटवार्ता हुँदा नेपालका प्रधानमन्त्री केपी शर्मा ओलीको निमन्त्रणासहितको सन्देश हस्तान्तरण गरिएको पनि उनले बताइन् ।
