काठमाडौं- संस्कृति पर्यटन तथा नागरिक उड्डयनमन्त्री बद्री पाण्डेले मुलुकको हवाई क्षेत्रलाई सुरक्षित बनाउन उच्चस्तरीय अध्ययन समिति गठन गर्ने बताएका छन् ।
सौर्य एयरलाइन्सको विमान दुर्घटनामा ज्यान गुमाएहरूको ४५ औँ पुण्य तिथीमा ‘म्याप मेमोरियल सोसाइटी’ले आइतबार भक्तपुरमा गरेको ‘के नेपालको आकाश सुरक्षित छ ?’ बिषयक अन्तक्रिया कार्यक्रममा मन्त्री पाण्डेले अर्को उच्चस्तरीय अध्ययन समिति गठन गर्ने जानकारी दिएका हुन् ।
नेपालको हवाई दुर्घटनापछिको प्रतिवेदनलाई एकीकृत गरि अध्ययन र नागरिक उड्ययन क्षेत्रलाई विश्वासनीय बनाउन उच्चस्तरीय अध्ययन समिति गठनको प्रस्ताव मन्त्रिपरिषदमा लैजाने तयारी भइरहको उनले बताए । मन्त्री पाण्डेले नियमनकारी निकाय र सेवा प्रदायक संस्था एउटै हुँदा नागरिक उड्ययन क्षेत्रमा समस्या र गुनासा आएकाले दुई निकायलाई छुट्याउने गरि विधेयक तयार भएको बताए । उनले यो विधेयक चाँडै मन्त्रिपरिषद्बाट अघि बढ्ने पनि बताए ।
हवाई क्षेत्रका बीमा लगायत विभिन्न ऐन समयानुकुल अघि बढाइने उनले जानकारी दिए । गैरसैनिक हवाई ऐन निकै पुरानो भएकाले परिमार्जन गर्ने गरि मन्त्रालयले तयारी गरेको उनको भनाइ छ । मन्त्री पाण्डेले सौर्य एयरलाइन्सको विमान दुर्घटनापछि गठित समितिले छानबिन गरिरहेको बताउँदै सरकारले हस्तक्षेप नगर्ने जिकिर गरे ।
छानबिन समितिले उचित निष्कर्ष निकालेर दिने प्रतिवेदनलाई सरकारले कार्यान्वयन गर्ने बचन पनि मन्त्री पाण्डेले दिएका छन्।
