काभ्रे। काभ्रेको रोशी गाउँपालिका –३ भञ्ज्याङ डाँडामा गत असोज १६ गते लोरो प्रहार गरेर आफ्नै आमाको हत्या गरी सुन र पैसा चोरी गरेर भागेका छोरा पक्राउ परेका छन् । पक्राउ पर्नेमा मृतक महिलाकै कान्छो छोरा २८ वर्षीय फुर्साङ लामा रहेका छन् ।

रोशी गाउँपालिका –३ भञ्ज्याङ गाउँ बस्ने पल्छङ लामाकी श्रीमती बर्ष ६९ की माइली लामालाई छोरा फुर्साङले हत्या गरेको प्रहरीको अनुसन्धानबाट खुल्न आएको हो । फुर्साङलाई घटनाको दुई दिनपछि पक्राउ गरेर अनुसन्धान अघि बढाएको छ ।

प्रहरीका अनुसार फुर्साङ लामाले भान्सा कोठामा सुतिरहेको आफ्नै आमाले कानमा लगाएको सुनको रिङ र नगदको लोभले मसला पिस्ने सिलौटो ढुङ्गाको लोरोले टाउकोमा प्रहार गरी हत्या गरेका थिए ।

काभ्रे प्रहरीका अनुसार फुर्साङलाई काभ्रे जिल्ला अदालतबाट ७ दिनको म्याद थप गरी अनुसन्धान गरिरहेको छ ।