काठमाडौं। क्रिकेट जगत्का महान् खेलाडी ब्रायन लारा नेपाल आइपुगेका छन् । आज बिहान फ्लाई दुबईको विमान मार्फत लारा काठमाडौंस्थित त्रिभुवन अन्तर्राष्ट्रिय विमानस्थलमा अवतरण गरेका हुन् ।

वेस्ट इन्डिजका पूर्व क्रिकेटर लारालाई नेपाल क्रिकेट संघ (क्यान)का प्रवक्ता छुम्बी लामा, प्रबन्धक विनोद दास लगायतका पदाधिकारीले स्वागत गरेका थिए । उनले भोलि नेपाल प्रिमियर लिग (एनपीएलमा) पाँच ओभर कमेन्ट्री गर्ने बताइएको छ । लाराले नेपालमा तीन दिन बिताउने छन् ।

ट्रिनिडाड एन्ड टोबागोका महान ब्याटर ५५ वर्षे लारा ओडीआई र टेस्ट क्रिकेट दुबैमा १० हजारभन्दा बढी रन बनाउने विश्वका सात खेलाडीमध्ये एक हुन् । टेस्ट क्रिकेटमा एकै इनिङमा नटआउट चार सय रन बनाउने कीर्तिमान लाराकै नाममा छ । उनी प्रथम श्रेणी क्रिकेटको एकै इनिङ्समा सर्वाधिक रन बनाउने खेलाडी समेत हुन् । उनको आगमनले एनपीएलको थप प्रचार विश्वभर हुनेछ ।