काठमाडौं। शीर्ष भूमिकामा पल शाहलाई लिएर निर्देशक परिच्छेद सेनले नयाँ चलचित्र ‘महाराजधिराज’को घोषणा गरेका छन् । मंगलबार सार्वजनिक टिजर पोस्टरमा अभिनेता शाहका दुई क्यारेक्टर लुक्स देख्न सकिन्छ ।

सामाजिक संजालबाट उनीहरूले फिल्मको प्रदर्शन मिति समेत घोषणा गरेका छन् । जसअनुसार, यो फिल्म आगामी दशैंको फूलपातिमा रिलिज हुने जनाइएको छ ।

फिल्मको घोषणा गर्दै सेनले लेखेका छन्, ‘आजको दिन मेरो लागि विशेष छ । म मेरो दोस्रो चलचित्र ‘महाराजधिराज’को पहिलो झलक सार्वजनिक गर्दैछु ।’ अभिनेता शाहले भने एघारौं फिल्मको रुपमा आफूले यो फिल्म गर्न लागेको उल्लेख गरेका छन् ।

पोस्टरमा शाहका दुई चरित्र देखिन्छ । एउटामा नग्न पात्र राज सिंहासनमा बसेको देखिन्छ भने अर्को पात्र भने श्रीपेच र शाही पोशाकसहित उभिएको छ ।

पोस्टरअनुसार यो फिल्मको पटकथाकार र निर्देशकको रुपमा सेन छन् । छत्रेश्वर म्यानेजमेन्ट प्रालिको ब्यानरमा यसलाई टोपेन्द्र विष्ट, चक्रबहादुर केसी र रवि खड्काले निर्माण गर्न लागेका हुन् । प्रस्तुतकर्तामा विराज विष्ट छन् ।

‘अनेकौं समस्या म देख्छु जगतमा, छ कि दोष हाम्रो यो आफ्नै रगतमा’लाई पोस्टरमा बटमलाइनको रुपमा प्रस्तुत गरिएको छ । फिल्मबारेका थप कुरा ट्रेलरमा सार्वजनिक हुने उल्लेख छ ।

निर्देशक सेनले लेखेका छन्, ‘धेरै तयारीपछि अन्ततः यो यात्रा सुरु भएको छ। । तपाईं सबैलाई यस यात्रामा सामेल हुन विनम्र निमन्त्रणा गर्दछु । तपाईंहरूको माया, साथ र प्रेरणाले हाम्रो यस यात्रालाई सार्थक बनाउनेछ । तपाईंहरूको साथको आवश्यकता पहिलेभन्दा अझै अझ बढी छ ।’ फिल्म कहिलेदेखि छायांकन हुने त्यो खुलाइएको छैन ।