काठमाडौं। सत्तारुढ नेकपा (एमाले)का सचिव तथा प्रतिनिधि सभा सदस्य योगेश भट्टराईले विधेयकहरू छिटोभन्दा छिटो अघि बढाउनुपर्ने बताएका छन् ।
शुक्रबार प्रतिनिधि सभा बैठकमा बोल्दै भट्टराईले देशले छोटो समयमा निकै उपलब्धि हासिल गर्नुपर्ने, तर समयको धेरै सुविधा नभएकाले जनअपेक्षा समयमै सम्बोधन बताए ।
‘संसद कानुन निर्माणको थलो बनोस् भनेर प्रधानमन्त्रीले भन्नुभएको छ । यो अपेक्षाप्रति म आभार प्रकट गर्छु । चारवटा अधिवेशनमा ४० वटा विधेयक दर्ता भएका थिए’, भट्टराईले भने, ‘३७ वटा विधेयक सरकारले दर्ता गरेका थिए । तीनवटा गैरसरकारी विधेयक थिए । दुःखका साथ भन्नुपर्छ – गएका चारवटा अधिवेशनमा १७ वटा विधेयक पास भए ।’
यो स्थिति सुखद नभएको बताउँदै भट्टराईले आजदेखि सुरु भएको संसद्को पाँचौँ अधिवेशनलाई विधेयक अधिवेशनको रूपमा लिन अनुरोध गरे ।
उनले विभिन्न समितिमा १४ वटा विधेयक भएको समेत बताए । प्रतिनिधि सभामा ३ वटा र राष्ट्रिय सभामा ३ वटा विधेयक दर्ता भएको बताउँदै भट्टराईले अन्य विध्येक पनि सरकारको तर्फबाट हुने दर्ता बताए । ‘अध्यादेशबाट जन्मिएको पार्टीले नै अध्यादेश गलत भन्यो’
भट्टराईले अध्यादेशबाट जन्मिएको पार्टीले नै अध्यादेश गलत भन्दै हिँडेको देख्दा अचम्ममा परेको बताए । वर्तमान सरकारले संसद् बैठक स्थगित गरी यसबीच ल्याएको आधादर्जन विधेयकप्रति प्रतिपक्षी दलहरूको असन्तुष्टि छ ।
सोही असन्तुष्टिप्रति इङ्गित गर्दै एमाले सचिव भट्टराईले एमाले फुटाउन माधव नेपालले पुष्पकमल दाहाल ‘प्रचण्ड’ प्रधानमन्त्री भएका बेला अध्यादेश ल्याउन लगाएको तर्क गरे ।
उनले भने, ‘अध्यादेशबाट जन्मिएको पार्टीले नै अध्यादेश गलत भन्दै छ । यो के हुन लागेको हो ? अचम्मै भएको छ ।’ उनले अध्यादेश ल्याउनु नौलो कुरा नभएको भन्दै भारतमा पनि सरकारले चाहिँदा अध्यादेश ल्याएको उदाहरण दिए ।
भट्टराईले अगाडि भने, ‘अध्यादेश ल्याउनु नौलो कुरा हैन । विगतमा हेर्दा विपक्षी दलका नेता प्रधानमन्त्री भएको बेला ०७९ पछि उहाँले तीनवटा अध्यादेश ल्याएर १४ वटा कानुन संशोधन गर्नुभयो । केपी ओलीले मात्र अध्यादेश ल्याएको हैन । नियमित प्रक्रिया हो । अध्यादेशको प्रक्रियामा कसैले विरोध जनाउनु पर्दैन । कन्टेन्टमा हामीसँग केही असहमति छन् भने पुष्पकमल दाहालकै नामबाट संशोधन आओस्, छलफल गरौँ ।’
