कञ्चनपुर। भारतसँग सीमा जोडिएका सुदूरपश्चिमका नाकाहरू हुँदै फर्कने नेपालीहरूमा कोरोना भाइरस (कोभिड–१९) को जोखिम अझै कायमै रहेको पाइएको छ। पश्चिमी सीमानाका गड्डाचौकीमा गरिएको एन्टिजेन परीक्षणमा बुधबार भारतको हल्द्वानीबाट फर्केका बर्दियाका एक जनाको अवस्था गम्भीर पाइएपछि उनलाई महाकाली प्रादेशिक अस्पताल महेन्द्रनगरको आइसोलेसनमा राखेर उपचार भइरहेको छ।
सुदूरपश्चिम प्रदेश प्रादेशिक आपत्कालीन कार्य सञ्चालन केन्द्रका सूचना अधिकारी हेमराज जोशीले भारतबाट फर्केका बिरामीमा उच्च ज्वरो, श्वासप्रश्वास र रुघाखोकीको समस्या देखिएको र एन्टिजेन परीक्षण गर्दा नतिजा पोजेटिभ आएपछि आइसोलेसनमा राखिएको बताए। सोही नाका हुँदै फर्केका पाँच जना शङ्कास्पद व्यक्तिमध्ये एक जनाको मात्र नतिजा पोजेटिभ आएको थियो।
महाकाली प्रादेशिक अस्पतालका मेडिकल सुपरिटेन्डेन्ट डा. अर्जुन भट्टले आइसोलेसनमा उपचार भइरहेका बिरामीको स्वास्थ्य अवस्थामा बिहानको तुलनामा सुधार आएको जानकारी दिए। पुनः कोरोना सङ्क्रमण बढ्न थालेपछि आइसोलेसनमा राखेर उपचार भइरहेका यी बिरामी यस क्षेत्रका पहिलो भएको उनले बताए।
डा. भट्टले भारतबाट फर्कनेहरूमा सङ्क्रमण देखिन थालेकाले मास्कको प्रयोग बढाउन, स्यानिटाइजर प्रयोग गर्न र अन्य स्वास्थ्यसम्बन्धी सावधानी अपनाउनुपर्नेमा जोड दिए। समुदायस्तरमा सङ्क्रमण फैलिन नदिन सङ्क्रमित व्यक्तिहरूलाई क्वारेन्टिन वा होम आइसोलेसनमा इमान्दारिपूर्वक बस्न पनि उनले सुझाव दिए।
भारतसँग सीमा जोडिएका प्रदेशका पाँचवटा क्षेत्रमा हेल्थ डेस्क मार्फत शङ्कास्पद बिरामीको एन्टिजेन परीक्षणको व्यवस्था गरिएको छ। कञ्चनपुरको गड्डाचौकी, कैलालीको गौरीफण्टा र खकरौला, बैतडीको झुलाघाट र दार्चुलाको पुलघाट सीमानाकामा रहेका हेल्थ डेस्कमा कार्यरत स्वास्थ्यकर्मीहरूले शङ्कास्पद बिरामीको पहिचान गरी एन्टिजेन परीक्षण गर्दै आएका छन्।
गत जेठ २१ देखि यही असार ४ गतेसम्म सीमानाका हुँदै फर्केका २३ जनामा कोरोना सङ्क्रमण पुष्टि भएको छ। जसमध्ये १६ जना निको भइसकेका छन् भने अझै सात जना होम आइसोलेसनमा बसेर उपचार गरिरहेका छन्।
यसले सीमावर्ती क्षेत्रमा कोरोनाको जोखिमलाई न्यूनीकरण गर्न थप सचेतना र सावधानी अपनाउनुपर्ने आवश्यकता देखाएको छ।
