काठमाडौं । कार्यवाहक प्रधानमन्त्री तथा सहरी विकास मन्त्री प्रकाशमान सिंहले निजामती सेवा विधेयकमा चलखेल गर्नेहरूमाथि कडा कारबाहीको चेतावनी दिएका छन्।
बुधवार कागेश्वरी मनोहरा नगरपालिकाको नवनिर्मित प्रशासनिक भवन उद्घाटन समारोहमा बोल्दै सिंहले विधेयकमा देखिएको गम्भीर विषयको छानबिन हुने बताए। जो कोही दोषी देखिए पनि कारबाही हुन्छ, उनले स्पष्ट शब्दमा भने।
सिंहले संविधान निर्माणका क्रममा हस्ताक्षर गरेका नेताहरू नै आज त्यसको विरोध गर्नु विडम्बनापूर्ण रहेको टिप्पणी गरे। साथसाथै, सरकारको आलोचना गर्ने नेताहरूले आफैं सत्ता सञ्चालनको समयमा के गरेका थिए भन्ने कुराको स्मरण गराउन खोजे।
कार्यक्रममा उनले जनताको विश्वास जित्न नेताहरूले काम गरेर देखाउनुपर्ने बताए। राजनीति जनताको सेवाका लागि हो, नाफाको लागि होइन, उनको भनाइ थियो। जनताको लागि काम नगर्ने नेताहरूलाई चुनावमा मूल्याङ्कन गरिनुपर्ने भन्दै जनतालाई सचेत रहन उनले आग्रह गरे। यस अवसरमा भवन निर्माणमा सहयोग गर्ने विभिन्न व्यक्तिहरूलाई सम्मान पनि गरिएको थियो।
