काठमाडौं । नेपाली कांग्रेसका नेता कृष्णप्रसाद सिटौलाले विशेष महाधिवेशन नहुने उनले बताएका छन् । सोमबार बिहान काठमाडौँमा आयोजित पत्रकार सम्मेलनमा सिटौलाले कार्यसम्पादन समितिले नियमित महाधिवेशन गर्ने निर्णय गरिसकेकाले त्यो महामन्त्रीद्वयले पनि मान्नुपर्ने बताएका हुन् ।
उनले भने, ‘उहाँहरूलाई हामीले पार्टीबाट निकाल्न खोजेको होइन, हामीले पार्टी छोड्न खोजेको पनि होइन । तर विशेष महाधिवेशन हुँदैन । कार्यसम्पादन समितिले निर्णय गरेको सबैले मान्नुपर्छ ।’
उनले व्यक्तिको निर्णय पार्टीको नहुने भन्दै १७(२) को औचित्य छैन भनेर केन्द्रीय कार्यसम्पादनले निर्णय गरिसकेको उनले स्मरण गरे ।
उनले कुनै पनि हालतमा पार्टी विभाजन हुन नदिने पनि बताए । उनले भने, ‘कांग्रेस पार्टी फुटोस् , कमजोर होस्, अनेक झगडा होस् भन्ने कसैको चाहना होला । हामी त्यो हुन दिँदैनौं ।’
सिटौलाले राष्ट्रियसभा निर्वाचनबारे कांग्रेसले अन्य पार्टीहरूसँग छलफल गरिरहेको जानकारी दिए । उनले यसबारे आजको कार्यसम्पादन समिति बैठकले टुंगो लगाउने बताए ।
उनले भने, ‘कुन कुन पार्टीसँग गठबन्धन हुने, क्लष्टर के हुने भन्नेमा आज टुंगो लाग्छ । एक्लै लड्दा परिणाम नआउने भएकाले राष्ट्रियसभामा गठबन्धन गर्ने कुरा भएको हो ।’
