चीनको अग्रणी अटोमोबाइल निर्माता जिली अटो ग्रुपले नेपालमा बिक्री भएका जिली EX5 विद्युतीय SUV मा एप्पल कारप्ले र एन्ड्रोइड अटो कनेक्टिभिटी सुविधा उपलब्ध गराएको छ । नयाँ प्रविधि अपडेटसँगै जिली EX5 ले स्मार्ट, सुरक्षित र सुविधाजनक ड्राइभिङ अनुभव प्रदान गर्ने कम्पनीको दाबी छ ।

यो कनेक्टिभिटी सुविधाले जिली EX5 को इन–कार डिजिटल इकोसिस्टमलाई थप उन्नत बनाएको छ । तीव्र गतिमा विस्तार हुँदै गएको नेपाली विद्युतीय सवारी बजारमा जिलीका गाडीहरूको उपस्थितिलाई यसले अझ मजबुत बनाउने अपेक्षा गरिएको छ ।

एप्पल कारप्ले र एन्ड्रोइड अटो सपोर्टमार्फत चालकले आफ्नो स्मार्टफोनलाई गाडीको सिस्टमसँग सहज रूपमा जोड्न सक्नेछन् । यस सुविधाबाट फोन कल गर्ने, सन्देश पठाउने वा प्राप्त गर्ने, संगीत सुन्ने तथा नेभिगेसन प्रयोग गर्न सकिनेछ । Siri वा Google Assistant प्रयोग गरी ह्यान्ड्स–फ्री भ्वाइस कमान्डमार्फत यी कार्य गर्न सकिने भएकाले चालकले स्टेयरिङ र सडकमा ध्यान केन्द्रित गर्न सक्ने कम्पनीले जनाएको छ ।

नयाँ सपोर्ट प्रणालीले स्मार्टफोनको परिचित इन्टरफेसलाई गाडीको इन–बिल्ट डिस्प्लेमा देखाउनेछ । ठूला र स्पष्ट आइकन तथा सहज लेआउटका कारण ड्राइभिङकै क्रममा Google Maps, Apple Maps, Waze, Spotify, Messages लगायतका आवश्यक एपहरू सजिलै प्रयोग गर्न सकिनेछन् । साधारण ब्लुटुथ कनेक्टिभिटीको तुलनामा यस प्रणालीले संगीत र पोडकास्टका लागि उच्च ध्वनि गुणस्तर प्रदान गर्ने जनाइएको छ ।

यसका साथै वास्तविक समयको नेभिगेसन, ट्राफिक अपडेट, सुरक्षित कल र नोटिफिकेसन व्यवस्थापन पनि सम्भव हुनेछ । टचस्क्रिन, स्टेयरिङ ह्विलका बटन र इन–बिल्ट माइक्रोफोनसँग पूर्ण रूपमा एकीकृत भएकाले यो प्रणाली प्रयोगमैत्री र सुरक्षित ड्राइभिङ वातावरण दिन सक्षम रहेको कम्पनीको भनाइ छ ।

यो सुविधा अन्तर्राष्ट्रिय बजारमा उच्च मागका कारण विश्वव्यापी रूपमा सुरु गरिएको हो । अब नेपाली उपभोक्ताले पनि अन्तर्राष्ट्रिय स्तरको इन–कार स्मार्ट कनेक्टिभिटी प्रविधि प्रयोग गर्न पाउने भएका छन् ।

नेपालमा ग्राहक–केन्द्रित कार्यान्वयन

जिली EX5 का लागि नेपालको आधिकारिक वितरक एलआरआर मोटर्सले हालसम्म बिक्री भएका सबै जिली EX5 सवारी साधनमा एप्पल कारप्ले र एन्ड्रोइड अटो सपोर्ट उपलब्ध गराउन सुरु गरिसकेको छ । कम्पनीका अनुसार सेवा टोलीले ग्राहकको घर वा कार्यस्थलमै पुगेर यो प्रविधि अपडेट इन्स्टल गरिरहेको छ, जसले अपग्रेड प्रक्रियालाई झन्झटमुक्त बनाएको छ ।

जिली अटो ग्रुपको प्रत्यक्ष सहकार्यमा उपलब्ध गराइएको यो स्मार्ट कनेक्टिभिटी अपग्रेडले जिली EX5 लाई अन्तर्राष्ट्रिय स्तरका प्रिमियम विद्युतीय गाडीहरूसँग प्रतिस्पर्धी बनाएको एलआरआर मोटर्सका प्रबन्ध निर्देशक जीवन जंग शाहीले बताए ।

उनका अनुसार भविष्यमा नेपाल भित्रिने जिली EX5 सवारी साधनहरूमा एप्पल कारप्ले र एन्ड्रोइड अटो प्रणाली इन–बिल्ट रूपमा नै उपलब्ध हुनेछ । त्यसका लागि थप इन्स्टलेसन आवश्यक नपर्ने बिक्री प्रमुख अधिराज श्रेष्ठले जानकारी दिए ।

नेपाली ईभी बजारमा जिलीको उपस्थिति थप मजबुत

जिली EX5 ले नेपालका शहरी क्षेत्र तथा हाइवे ड्राइभिङ सेग्मेन्टमा उल्लेखनीय लोकप्रियता हासिल गरिसकेको छ । विराटनगर, बुटवललगायत शहरहरूमा विस्तार हुँदै गएको डिलर नेटवर्कसँगै आगामी वर्षभित्र सातै प्रदेशमा उपस्थिति विस्तार गर्ने योजना कम्पनीले सार्वजनिक गरिसकेको छ ।

एप्पल कारप्ले र एन्ड्रोइड अटो सपोर्टसँगै जिली EX5 ले कार्यक्षमता, आराम, सुरक्षा र स्मार्ट कनेक्टिभिटीको उत्कृष्ट संयोजन प्रस्तुत गर्दै नेपालमा उपलब्ध सबैभन्दा फिचर–सम्पन्न विद्युतीय SUV मध्ये एकका रूपमा आफ्नो पहिचान थप सुदृढ बनाएको छ ।

गत वर्षको नाडा अटो शोमा सार्वजनिक भएपछि आधुनिक डिजाइन, प्रिमियम इन्टेरियर, उन्नत सुरक्षा प्रविधि र प्रभावकारी विद्युतीय कार्यक्षमताका कारण जिली EX5 छोटो समयमै चर्चित विद्युतीय सवारीमध्ये एक बनेको थियो । विश्वव्यापी रूपमा लोकप्रिय स्मार्टफोन कनेक्टिभिटी सुविधा थपिएसँगै यसको समग्र ड्राइभिङ अनुभव अन्तर्राष्ट्रिय स्तरमा पुगेको कम्पनीको दाबी छ ।

नेपालमा दिगो र प्रविधि–केन्द्रित यातायाततर्फको यात्रामा जिली अटो ग्रुपको नवप्रवर्तन र ग्राहक–केन्द्रित अपग्रेड रणनीतिले नेपाली अटोमोबाइल बजारमा दीर्घकालीन प्रतिबद्धता झल्काएको देखिन्छ ।