चितवन। पूर्व गृहमन्त्री, राष्ट्रिय स्वतन्त्र पार्टी (रास्वपा)का सभापति तथा गोर्खा मिडिया नेटवर्कका तत्कालीन प्रबन्ध निर्देशक रवि लामिछाने चितवन जिल्ला अदालतमा बयान दिन चितवन पुगेका छन् ।

लामिछाने गए राति नै काठमाडौंबाट स्थलमार्ग हुँदै चितवन पुगेका हुन् । लामिछाने आज १० बजे नै चितवन जिल्ला अदालतमा उपस्थिति हुने बताइएको छ । अदालतका श्रेस्तेदार विष्णुप्रसाद आचार्यले लामिछाने चितवन अदालतमा उपस्थित भएपछि बयानबाट अदालती प्रक्रिया सुरू हुने छ । बयानपछि दुई पक्षको बहस हुनेछ भने लगत्तै थुनछेक आदेश आउने छ ।

जिल्ला सरकारी वकिल कार्यालयले हिजो साहारा चितवन बहुउद्देश्यीय सहकारी संस्था लिमिटेडको रकम ठगी गरेको अभियोगमा लामिछाने सहित १५ जना विरुद्ध पूरक मुद्दा दायर गरेको थियो । योसँगै हालसम्म चितवन बहुउद्देश्यीय सहकारी संस्था लिमिटेडको रकम ठगी गरेको अभियोगमा ३२ जना विरुद्ध मुद्दा दर्ता भएको छ । जसमध्ये १२ जनालाई ठगी तथा संगठित अपराधमा मुद्दा दायर गरिएको छ भने लामिछाने सहित २० जनालाई ठगी मात्रै मुद्दा दायर गरिएको छ ।

रविका साझेदार जीबी राई र छविलाल जोशीलाई ठगी र संगठित अपराध दुवै कसुरमा मुद्दा दायर गरिएको छ । यस मुद्दामा जोडिएका धेरैजसो फरार छन् ।

हिजो दर्ता गरिएको मुद्दामा लामिछानेलाई मुलुकी अपराध संहिता २०७४ अन्तर्गत दफा २४९ को उपदफा १ र २ विपरीत कसुर गरेको भन्दै दफा २४९ को उपदफा ३ (ग) बमोजिम सजाय हुने माग दाबी‍ लिइएको छ । उक्त दफामा कुनै किसिमले ठगी गरेमा ७ वर्ष कैद र ७० हजार रुपैयाँसम्म जरिवाना हुन सक्ने उल्लेख छ । यस्तै तत्कालीन गोर्खा मिडिया नेटवर्कमा रहेकाहरूलाई अपचलन भएको रकमको सामूहिक बिगो माग दाबी समेत गरिएको छ ।

साहारा सहकारीको १० करोड ८० लाख १८ हजार रुपैयाँ गोरखा मिडिया नेटवर्कमा गएपछि लामिछाने यस मुद्दामा जोडिए । यसअघि लामिछानेले सरकारी वकिल कार्यालयको रोहबरमा दुई दिन लगाएर बयान दिएका थिए। यसअघि पोखरा, काठमाडौं र बुटवलका सहकारी रकम अपचलन मुद्दामा लामिछानेलाई धरौटीमा छाड्ने आदेश आएको थियो ।

साहारा सहकारीका पीडित बचतकर्ताले २०८० असोज ९ मा चितवन प्रहरीमा उजुरी दिएपछि अनुसन्धान अघि बढेको थियो । सहकारीको बचतकर्ताको उजुरीको आधारमा गोरखा मिडिया नेटवर्कका अध्यक्ष जीबी राई सहित १७ जना विरुद्ध गत असोज ८ गते ठगी मुद्दा दायर भएको थियो ।

राशिफलः तपाईंको आजको दिन कस्तो रहनेछ ?

– ज्योतिष पण्डित सूर्यनाथ लुइटेल

मेषः विरोधी साथी सक्रिय भएकाले व्यवहार गर्दा सचेत बन्नुपर्ने समय छ। सहयोगी साथी पहिचान गर्नुपर्ने समय आएको छ। सञ्चित धन खर्च हुनेछ। स्वास्थ्यले भने राम्रो साथ दिनेछ। परिवारसँगको दाम्पत्य जीवन सुखमय रहनेछ।

वृषः वक्र बृहस्पति आफ्नै राशिमा पुगेकाले बोल्दा सचेत बन्नुपर्ने समय छ। शास्त्रको अध्ययनमा बितेको समय सफल बन्नेछ। कर्मको स्थानमा शनिदेव भएकाले व्यापारमा सहकार्य गर्नु उचित हुनेछ। परिवारको साथ र सहयोग प्राप्त हुनेछ।

मिथुनः दिन सहज छ। साथीभाइसँगको भेटले नयाँ योजना बन्नेछन्। धार्मिक कार्यक्रममा सहभागी हुने अवसर मिल्नेछ। परिवारमा थोरै बोल्नु उचित हुनेछ। दक्षिणको लामो यात्रा नगर्नु राम्रो हुनेछ।

कर्कटः दिन राम्रो छ। अढैया शनिको प्रभाव रहेकाले थोरै बोलेर अगाडि बढ्नु उचित हुनेछ। परिवारमा रमाएर बस्ने दिन छ। कडा विपक्षी भएकाले समझदारी गरेर अगाडि बढ्नुपर्नेछ। परीक्षाको नतिजा राम्रो प्राप्त हुनेछ।

सिंहः दिन सहज छ। धार्मिक क्षेत्रमा भन्दा शिक्षाको क्षेत्र मन लाग्नेछ। यो क्षेत्रमा गरेको प्रयास सफल बन्नेछ। बोली र व्यवहारमा एकरुपता हुन नसक्दा विवाद बढ्नेछ। दाम्पत्य जीवन भने सुखमय रहनेछ।

कन्याः दिन सामान्य राम्रो छ। चिट्ठामा घाटा हुनेछ। परिवारका सदस्यले भन्दा बाहिरका व्यक्तिले सहयोग गर्ने दिन छ। धार्मिक क्षेत्रको भ्रमण गर्न सकेमा मन शान्त बन्नेछ।

तुलाः दिन राम्रो छ। व्यवहार गर्दा मन फुकाएर गर्नुपर्नेछ। शिक्षामा गरेको मेहनतको फल प्राप्त हुनेछ। स्वास्थ्यमा सुधार हुनेछ। परिवारसँग रमाइलो गर्ने अवसर मिल्नेछ। प्रेम सम्बन्ध सुमधुर बन्ने योग छ।

वृश्चिकः दिन तपाईं अनुकूल रहेको छ। स्वास्थ्यमा सुधार हुनेछ। प्राविधिक शिक्षामा गरेको लगानीबाट राम्रो नतिजा प्राप्त हुनेछ। विपक्षी साथीहरु सक्रिय भएकाले काम गर्दा सचेत बन्नुपर्नेछ। संकटमा परिवारको साथ मिल्नेछ।

धनुः राजनीतिक क्षेत्रमा अवरोध सिर्जना हुनेछन्। स्वास्थ्यमा सुधार हुनेछ। मन चिन्तित बन्नेछ। शिक्षामा गरेको लगानी फाइदाजनक रहेको छ। परिवारमा थोरै बोलेर अगाडि बढ्नु उचित हुनेछ।

मकरः राज्यको तर्फबाट महत्त्वपूर्ण अवसर प्राप्त हुनेछ। खानपानमा ख्याल नगर्दा स्वास्थ्यमा समस्या हुने भएकाले सचेत बन्नुपर्ने दिन छ। धनस्थानमा भएको शनिदेवका कारण सञ्चित धन खर्च हुनेछ।

कुम्भः मनमा खटपटी बढ्नेछ। यो मध्यसाढेसाती दशाको फल हो। जन्मकुण्डलीको उच्च ठाउँमा शनि भए प्रगतिसमेत हुनेछ। लगानीका क्षेत्र सबल रहेका छन्। साथीभाइको साथ मिल्नेछ।

मीनः तपाईंको राशिमा उदयमान शुक्र पुगेका छन्। बौद्धिक क्षमता बढ्नेछ। परिवारको सल्लाह लिएर अगाडि बढेमा शिक्षामा गरेको प्रयास सफल र सहज बन्नेछ। धार्मिक कार्यमा सहभागी भएर दिनको सुरुवात गर्नु उचित हुनेछ।

काठमाडौँ । सिद्धार्थ हस्पिटालिटीले ‘क्यान्सरविरुद्धको खाना’ अभियान सुरु गरेको छ । सिद्धार्थ ग्रुपका प्रमुख कार्यकारी अधिकृत ९सीइओ० कृष्ण न्यौपानेले विश्व क्यान्सर दिवसका अवसरमा माघ २२ गतेदेखि उक्त अभियान सुरु गरिएको घोषणा गरेका हुन् ।

“क्यान्सरविरुद्धको खाना अभियान सफल पार्न विभिन्न प्रवर्द्धनात्मक कार्यक्रम तय गरिएको छ, जसमा पोषणयुक्त खाना, क्यान्सरबारे जानकारसँग वर्कसप र पोडकास्ट, समुदायको संलग्नता, स्वास्थ्य विज्ञसँगको साझेदारी र सहकार्य, कर्मचारीका लागि तालिम र सामाजिक सञ्जालमार्फत सचेतना अभियान शीर्षकमा कार्यक्रम सञ्चालन गरिनेछ”, सीइओ न्यौपानेले भने ।

सिद्धार्थ हस्पिटालिटीका अनुसार खानामार्फत क्यान्सर रोगविरुद्ध लड्न जागरुकता जगाउनका लागि ‘विशेष स्वस्थकर मेनु’को तयार गरिनेछ । ताजा फलफूल, हरियो सागपात, अन्न, ओमेगा–३ युक्त खाना, एन्टी इन्फ्लेमेटरी मसलाभएको खानालाई क्यान्सर रोगविरुद्धका खानाका रुपमा प्रचारप्रसार गरिनेछ ।

अभियानमा सेफहरुले स्वस्थकर खाना कसरी पकाउने भनेर प्रत्यक्ष रुपमा जानकारी दिनेछन् । अभियानअन्तर्गत नै सिद्धार्थ हस्पिाटलिटीअन्तर्गतका होटल तथा रेष्टुरेन्टका डाइनिङ टेबलमा पोषण खानासम्बन्धी जानकारी दिने कार्डहरु राखिनेछन् ।

साथै क्यान्सर रोग विशेषज्ञसँग कार्यशाला र पोडकास्ट अन्तर्वार्ता पनि सञ्चालन गरिनेछ । जसमा पोषण तथा क्यान्सरविद्सँग योजनाबद्ध खानपान, अस्वस्थकर खाद्यपदार्थ पहिचान तथा सही परिणाममा कसरी भोजन गर्ने विषयबारे जानकारी दिइनुका साथै छलफल गरिनेछ । त्यसअवसरमा सहभागीहरुले विज्ञसँग अन्तरक्रियात्मक छलफल गर्न पाउने कम्पनीको भनाइ छ ।

क्यान्सरविरुद्ध जनचेतना जगाउने उद्देश्यले समुदायको संलग्नतालाई पनि प्राथमिकता दिइनेछ । यस अभियानमा सहभागीहरुले ‘कुक टु कम्ब्याट क्यान्सर’ शीर्षकमा आफूलाई मनपर्ने रेसिपीबारे अरुलाई बताउन सक्नेछन् । उत्कृष्ट रेसिपीलाई सिद्धार्थ हस्पिटालीको मेनुमा समावेश गर्नुका साथै सामाजिक सञ्जालमार्फत प्रचारप्रसार गरिनेछ । यसै अभियानअन्तर्गत स्वस्थकर खाना महोत्सव पनि आयोजना गरिनेछ । महोत्सवमा क्यान्सर रोगसँग लड्न सहयोग गर्ने खानाहरुको स्टल, स्मुदी बार र सलाद काउन्टरको व्यवस्था गरिनेछ ।

अभियान कै हिस्साका रुपमा स्वास्थ्य विशेषज्ञसँगको सहकार्यमा स्वस्थकर मेनुबारे चर्चा गर्दै प्रचारप्रसार गरिनेछ भने स्थानीय अर्ग्यानिक किसानसँगको साझोदारीलाई दिगोपना र स्वास्थ्य प्रवर्द्धन गरिने कम्पनीले जनाएको छ ।

सिद्धार्थका अनुसार अभियानकै क्रममा हस्पिटालिटीमा कार्यरत सेफ तथा कर्मचारीलाई यसबारे जानकारी प्रदान गरी होटल तथा रेष्टुरेन्टमा आउने ग्राहकलाई क्यान्सरसँग लड्न मद्दत गर्ने खाना सेवनका लागि प्रोत्साहन गरिनेछ ।

अभियानलाई सफल पार्न सामाजिक सञ्जालमार्फत क्यान्सर रोगीका लागि लाभदायक खानाका परिकार र रेसिपीको प्रचारप्रचार तथा प्रवर्द्धन गरिनेछ । उपभोक्तालाई भिडियो, इन्फ्रोग्राफ र रेसिपीमार्फत जानकारी दिइनेछ । अभियानका मुख्य आकर्षक तथा महत्वपूर्ण विषयवस्तु र विज्ञहरुको प्रचारप्रसार गरिनेछ छ । यस अभियानलाई प्रवर्द्धन गर्नका लागि सिद्धार्थ हस्पिटालिटीले विभिन्न मेनुमा विशेष छुटको अफर समेत सुरु गर्ने कम्पनीको भनाइ छ ।

भारतको ७७ औं सेना दिवसको अवसरमा काठमाडौंस्थित भारतीय राजदूतावासले एक विशेष समारोहको आयोजना गरेको छ।समारोहमा नेपाली सेनाका प्रधान सेनापति अशोक राज सिग्देल प्रमुख अतिथिको रुपमा सहभागी थिए।

समारोहलाई सम्बोधन गर्दै नेपालका लागि भारतीय राजदूत नवीन श्रीवास्तवले भारत र नेपालबीचको ऐतिहासिक सम्बन्धको चर्चा गरेको भारतीय दूतावासले  विज्ञप्तिमार्फत जानकारी दिएको छ ।  उनले भारतीय सेनामा गोर्खा सैनिकहरुले पुर्‍याएको योगदानको उच्च प्रशंसा गरेको विज्ञप्तिमा उल्लेख छ ।

प्रधानसेनापति सिग्देलले भारतीय सेनालाई ७७ औं सेना दिवसको शुभकामना दिँदै दुई देशबीचको बलियो सैन्य सम्बन्धको चर्चा गरेको दूतावासले जनाएको छ । सो अवसरमा  उनले नेपाली सेनाको क्षमता विकासमा भारतीय सेनाले गरेको सहयोगको पनि प्रशंसा गरे।समारोहमा भारतीय सेनाका वीरता पुरस्कार विजेता गोर्खा सैनिकहरुलाई सम्मान गरिएको थियो। कार्यक्रममा दुई देशका सेनाका उच्च अधिकारीहरु, कुटनैतिक व्यक्तित्वहरु, सरकारी अधिकारीहरु र पत्रकारहरुको उपस्थिति थियो।

पोखरा। पोखरा महानगरपालिका क्षेत्रमा करिब २३ हजार ७४८ बालिकाहरूलाई पाठेघरको मुखमा हुने क्यान्सरविरुद्धको एचपीभी खोप लगाइने भएको छ। उक्त अभियानको शुभारम्भ नगर प्रमुख धनराज आचार्यले मालेपाटनस्थित वाराही माध्यमिक विद्यालयबाट गरेका छन् ।

आजदेखि फागुन ६ गतेसम्म महानगरका २ सय ७५ विद्यालय र ४७ वटा स्वास्थ्य संस्थाहरूमा ३ सय ४४ जना स्वास्थ्यकर्मी र ६ सय ८८ जना स्वयंसेवक परिचालन गरी यो खोप अभियान सञ्चालन गरिने जनस्वास्थ्य अधिकृत तेजाखर लम्सालले जानकारी दिए ।

विद्यालय उमेरका कक्षा ६ देखि १० सम्म अध्ययनरत छात्राहरू तथा विद्यालयबाहिर रहेका १० देखि १४ वर्षसम्मका बालिका तथा किशोरीहरूलाई यो खोप प्रदान गरिनेछ। नगर प्रमुख आचार्यले छोरीहरूको स्वस्थ जीवन र भविष्यमा आउन सक्ने सम्भावित स्वास्थ्यसम्बन्धी जोखिम न्यूनीकरण गर्नका लागि यो खोप अनिवार्य रूपमा लगाउन आह्वान गरेका छन् ।

नेपालमा पाठेघरको मुखमा हुने क्यान्सर रोकथामका लागि १० देखि १४ वर्षसम्मका किशोरीहरूलाई एचपीभी खोप लगाउने, ३० वर्ष माथिका महिलाहरूको पाठेघरको मुखको परीक्षण (स्क्रिनिङ)गर्ने र पाठेघरको मुखको क्यान्सर रोग निदान भएका महिलाहरूको नियमित उपचार गर्ने अभियानहरू सञ्चालन भइरहेका छन्।

काठमाडौं। नेपाल औषधि लिमिटेडले विश्व स्वास्थ्य संगठनको मापदण्ड कुशल औषधि उत्पादन अभ्यास (जिएमपी) प्रमाणपत्र प्राप्त गरेको छ ।

लिमिटेडले सम्पूर्ण मापदण्ड पूरा गरेपछि स्थापना भएको पाँच दशकपछि आज औषधि व्यवस्था विभागबाट अन्तर्राष्ट्रिय मान्यताको उक्त प्रमाणपत्र प्राप्त गरेको कम्पनीका महाप्रबन्धक कैलाशकुमार पनेरुले जानकारी दिए।

‘विसं २०२९ सालमा कम्पनी स्थापना भए पनि २०६४र६५ सम्म जिएमपीको प्रावधान थिएन, यो प्रावधान आएपछि कम्पनीले औषधि उत्पादन बन्द गरेको थियो’, उनले भने, ‘विसं २०७४ सालदेखि कम्पनीले सो मापदण्डमा औषधि उत्पादन सुरु गरेपछि आज मात्रै उक्त प्रमाणपत्र प्राप्त भएको हो ।

प्रमाणपत्र प्राप्त गर्नु आफैमा ठूलो उपलब्धि हो उनले बताए। हाल कम्प नीले ओरल रिहाइड्रेसन साल्ट (ओआरएस), ट्याबलेट र हेमोडालाईसस फ्लूइड (पार्ट–१ र २) अन्तर्गत १४ प्रकारका औषधि उत्पादन गरिरहेको छ ।

कम्पनीले आगामी दिनमा दीर्घरोगीका लागि लक्षित गरी कोलेस्ट्रोल, सुगर र प्रेसरको औषधि उत्पादनका योजना बनाएको महाप्रबन्धक पनेरु बताए। सरकारबाट आवश्यक बजेट विनियोजन भए कम्पनीको योजनामा रहेका सबै ९८ वटा प्रकारका औषधि उत्पादन गर्न समेत सकिने उनको भनाइ थियो ।

दीर्घरोगीका लागि औषधि उत्पादन गर्न काठमाडौँ महानगरपालिकासँग सहकार्य सुरु भइसकेको उनले जानकारी दिए ।

‘कम्पनी र काठमाडौँ महानगरपालिकाबीच दीर्घरोगीका लागि औषधि उत्पादनका लागि समझदारी पत्रमा हस्ताक्षर भइसकेको छ, आजैमात्रै निर्णय भई अनुसन्धानको काम सुरु भइसकेको छ’, उनले भने।

काठमाडौं। भुटानका राजा जिग्मे खेसर नामग्याल वाङचुकले कुम्भमेलामा डुबुल्की लगाएका छन् । सोमबार भारत पुगेका उनले उत्तर प्रदेशका मुख्यमन्त्री योगी आदित्यनाथसहित गंगामा स्नान गरेका हुन् ।

लखनउस्थित चौधरी चरण सिंह अन्तर्राष्ट्रिय विमानस्थलमा स्वागत गरेका मुख्यमन्त्री योगी आदित्यनाथले भुटानका राजालाई गंगासम्मै लगेर गएका हुन् ।

भुटानी नरेशले गंगा पूजा र आरती पनि गरेका छन् । त्यसपछि उनी अक्षयबटधाम तथा लेटे हनुमानको पनि दर्शन र पूजा गर्न पुगे ।

मुख्यमन्त्री योगी आदित्यनाथ भुटानी राजालाई लिएर लखनउबाट बमरौली एयरपोर्टमा उत्रिए । त्यसपछि सडकमार्ग हुँदै दुवैजना कुम्भमा स्नान गर्न पुगे। अरैलीले घाटबाट बोट चढेर संगममा डुबुल्की लगाएको भारतीय सञ्चारमाध्यामले लेखेका छन् ।

योगी तथा भुटानका राजा आएपछि हनुमान मन्दिर तथा अक्षयबटमा श्रद्धालुका लागि ढोका बन्द गरिएको थियो। मंगलबार साँझ ४ बजेपछि श्रद्धालुका लागि उक्त स्थान खोलिने छ ।

अब बुधबार भारतीय प्रधानमन्त्री नरेन्द्र मोदी महाकुम्भमा जाने छन् । मोदी आउने भएपछि मुख्यमन्त्री योगीले हेलिप्याडदेखि अरैलीघाटदेखि संगमस्थलसम्मको व्यवस्थापन हेरेका छन् ।

मंगलबार महाकुम्भको २३ औँ दिन भएको छ। अहिलेसम्म ३७ करोड मानिसले स्नान गरिसकेका छन् । मंगलबार मात्रै बिहान १० बजेदेखि ४२ लाख बढीले स्नान गरिसके बताइएको छ। सोमबार २ करोड ३३ लाखले स्नान गरेको भारतीय सञ्चारमाध्यामले लेखेका छन् ।