काठमाडौं– नेकपा एमालेका अध्यक्ष केपी शर्मा ओलीले गृहमन्त्री रवि लामिछानेको बचाउ गरेका छन् ।
उपप्रधान तथा गृहमन्त्री रवि लामिछाने माथि छानबिन गर्न संसदीय समिति बनाएपछि राजीनामाको खेल सुरु हुने भन्दै संसदीय समिति आवश्यक नभएको बताए । एमाले संसदीय दलको बैठकलाई शुक्रबार सम्बोधन गर्दै ओलीले कांग्रेसले भने जस्तो संसदीय समिति बनाए पुनः कांग्रेसले राजीनामा माग्ने तर्क गरे ।
उनले भने, ‘हामीले रविजीको राजीनामा मागेका छैनौँ भन्नु भएको छ । अहिले समिति बनिसकेपछि मन्त्रीको पदमा बस्न मिल्छ ? छानबिन समिति बनाए लगतै राजीनामाको खेल सुरु गर्नु हुन्छ ।’
उनले उजुरी पर्दैमा छानबिन गर्ने हो भने सबैका विरुद्ध उजुरी पर्ने बताए । उनले अगाडि भने, ‘सहकारीको अवस्थामा के छानबिन गर्ने ? बेथिति भएको छ छैन भन्दा छ, लगानीकर्ता डुबाइएको छ कि छैन भन्दा छ ?’ उनले भने, ‘अब रिसर्च के गर्ने ? सरकारले कदम चाल्न पर्यो कसरी समस्या समाधान गर्ने ।’
