काठमाडौँ– पोर्चुगल पठाइदिन्छु भनी रकम ठगी गर्ने दुई जना पक्राउ परेका छन् ।
पक्राउ पर्नेमा गोरखा जिल्ला घ्यालचोक गाउँपालिका वडा नं. ८ स्थायी घर भई हाल ललितपुर जिल्ला गोदावरी नगरपालिका वडा नं. १४ ठैब बस्ने ५१ वर्षीय दुर्गा बहादुर रेग्मी र सोही स्थान बस्ने ४५ वर्षीय कमला रेग्मी रहेका छन् ।
उनीहरूले सुजन कार्की समेत ३ जनालाई पोर्चुगल पठाइदिन्छु, पोर्चुगल जान प्रतिव्यक्ति १३ लाख रुपैयाँ लाग्छ र त्यहाँ पुगेपछि प्रतिष्ठित होटलमा मासिक २ लाख भन्दा बढी तलबको काम लगाइदिन्छु भनी प्रलोभनमा पारी पीडितहरूबाट पटक पटक गरी २१ लाख रुपैयाँ रकम लिई ठगी गरेकोले वैदेशिक रोजगार विभागबाट पक्राउ गरी उपस्थित गराइदिन भनी पत्राचार भएपछि काठमाडौँ उपत्यका अपराध अनुसन्धान कार्यालय मिनभवनमा खटिएको विशेष प्रहरी टोलीले उनीहरूलाई खोजतलास गर्ने क्रममा बिहीबार ललितपुरको गोदावरी बाट पक्राउ गरेको हो ।
उनीहरूलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर, काठमाडौँ पठाइएको प्रहरीले जनाएको छ ।
