काठमाडौं। नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रिय एकतालाई अझ बढी बलियो बनाउनेमा सवैको ध्येय रहेको बताएका छन्।
राष्ट्रिय लोक सन्चारकर्मी नेपालले बिहीबार प्रचण्ड निवास खुमलटारमा आयोजना गरेको देउसी भैलो कार्यक्रममा प्रचण्डले कलाकार, पत्रकार सवैको ध्येय राष्ट्रिय एकतालाई अझ बढी बलियो बनाउनेमा रहेको बताएका हुन्।
राष्ट्रिय स्वाधिनतालाई सुदृढ गर्दै नेपाली जनताको उज्वल भविष्का लागि सवै एक हुनुपर्ने उनले बताए। उनले आफू शान्ति प्रक्रियामा आएदेखि नै कला र खेलकुदको क्षेत्रलाई उच्च प्राथमिकता दिँदै आएको दाबी गरे।
कला संस्कृतिको जगेर्ना नगरिकन राष्ट्रको अस्मिताको जगेर्ना हुन नसक्ने उनको भनाइ छ। उनले तिहारका अवसरमा देश र बिदेशमा रहेका नेपालीप्रति शुभकामना व्यक्त गरे। कार्यक्रममा कलाकारहरुले देउसी भैलो खेल्दै सांस्कृतिक प्रस्तुति देखाएका थिए।
