खोटाङ। खोटाङबाट काठमाडौं जाँदै गरेको सुमो दुर्घटना भएको छ । सिद्धिचरण राजमार्ग अन्तरगत ओखलढुंगाको मानेभञ्ज्याङ गाउँपालिका–७ भडारेखोलामा सुमो दुर्घटना भएको हो ।
गए राति बिरामी लिएर हिँडेको ना१ज ६४२१ नम्बरको सुमो सडकबाट करिब एक सय मिटर तल खसेको छ । सुमोमा सवार खोटाङ केपिलासगढी गाउँपालिका–३ बस्ने ५६ वर्षीया मायादेवी गुरुङ, उनका छोरा वर्ष २८ को पुजन गुरुङ र दिक्तेल रूपाकोट मझुवागढी नगरपालिका–१२ बस्ने ४५ वर्षीया तारा गुरुङको मृत्यु भएको छ ।
स्थानीयले आज बिहान जीप खसेको देखेपछि प्रहरीलाई खबर गरेका थिए । जीप बिहान दुर्घटनामा परेको हो वा गएराति नै खसेको हो भन्ने खुलेको छैन । घटनाको अनुसन्धान भइरहेको प्रहरीले जनाएको छ ।
