काठमाडौं। हाल देशका विभिन्न भागमा चट्याङसहित पानी परिरहेको छ भने मौसमीय प्रणाली क्रमशः अन्य क्षेत्रतर्फ सर्दै गएको जल तथा मौसम विज्ञान विभागले जनाएको छ।
विभागका अनुसार सुदूरपश्चिम प्रदेशको डडेलधुरा र डोटी जिल्लामा चट्याङसहित वर्षा भइरहेको छ, जुन प्रणाली पूर्वतर्फ सर्दै गएको छ।
त्यस्तै, कोशी प्रदेशको इलाम, ताप्लेजुङ, भोजपुर र खोटाङ जिल्लामा समेत चट्याङसहित वर्षा भइरहेको छ भने प्रणाली उत्तरतिर सर्दै गएको जनाइएको छ।
बागमती प्रदेशका ललितपुर, काभ्रेपलाञ्चोक, सिन्धुपाल्चोक, मकवानपुर र सिन्धुली जिल्लामा पनि पानी परिरहेको र अझै केही समय यस्तै अवस्था रहन सक्ने पूर्वानुमान गरिएको छ।
विभागले चट्याङ, वर्षा तथा हावाहुरीका सम्भावित जोखिमलाई ध्यानमा राख्दै सर्वसाधारणलाई आवश्यक सतर्कता अपनाउन अनुरोध गरेको छ।
