काठमाडौं । नेपाली कांग्रेसका वरिष्ठ नेता डा. शेखर कोइरालाले पार्टी सभापति शेरबहादुर देउवालाई सामाजिक सञ्जालमा गाली गर्नुको सट्टा, उनले गरेका योगदानको कदर गर्न कार्यकर्तालाई आग्रह गरेका छन्। गिरिजाप्रसाद कोइरालाको १०१औं जन्मजयन्तीको अवसरमा शनिवार आयोजित एक कार्यक्रममा बोल्दै डा. कोइरालाले भने, “सभापति देउवा लगायत नेताहरूले विगतमा भोगेका संघर्ष र बलिदानका कारण आज हामी यहाँ छौं। त्यसैले आलोचना गर्नुभन्दा पहिले इतिहास सम्झनुपर्छ।”
उनले कार्यकर्तालाई सकारात्मक सोचका साथ नेताहरूको योगदानमाथि पनि लेख्न र चर्चा गर्न प्रेरित गरे। “गिरिजाबाबु, देउवा जस्ता नेताले जेल र यातना सहनु नपरेको भए, हामी आज यहाँ हुने थिएनौं,” उनले थपे। त्यसै कार्यक्रममा सभापति शेरबहादुर देउवाले स्व. गिरिजाप्रसाद कोइरालाको नेतृत्वमा संघीय लोकतान्त्रिक गणतन्त्रको स्थापनामा पुर्याएको भूमिकालाई स्मरण गर्दै वर्तमानमा संविधानको कार्यान्वयन र आर्थिक रूपान्तरणतर्फ केन्द्रित हुनुपर्ने बताए।
कार्यक्रममा कांग्रेस नेता तेजुलाल चौधरीले गिरिजाबाबुलाई ‘क्रान्ति र शान्तिका नायक’ भने, जबकि सहमहामन्त्री महालक्ष्मी उपाध्यायले राजनीतिक उपलब्धिलाई संस्थागत गर्न युवा पुस्ताको सक्रिय सहभागिता आवश्यक रहेको बताइन्। कार्यक्रमको विशेष आकर्षणमा देउवाले राष्ट्रिय तथा अन्तर्राष्ट्रिय प्रतियोगितामा विजेता बनेका खेलाडीहरू र स्वतन्त्र विद्यार्थी युनियनको निर्वाचनमा विजयी भएका उम्मेदवारहरूलाई सम्मानित गरेका थिए । नेपाली कांग्रेसभित्र पछिल्लो समय १५ औँ महाधिवेशनको विषयलाई आन्तरिक तथा बाह्य कार्यक्रमहरुमा छलफल भइरहेको छ । डा. कोइराला १५ औँ महाधिवेशनका सभापतिका आंकाक्षी हुन् ।
