ललितपुर। नेकपा (एमाले)को दशौं केन्द्रीय कमिटी बैठक आजदेखि ललितपुरको भनिमण्डलस्थित रामबाग महलमा सुरु भएको छ । जेन–जी आन्दोलन, प्रतिनिधिसभा विघटन र नयाँ सरकार गठनपछिको विशेष राजनीतिक परिस्थितिमा बसेको यो बैठक एमालेको केन्द्रीय तहको पहिलो पूर्ण बैठक हो ।
बैठकलाई सम्बोधन गर्दै अध्यक्ष केपी शर्मा ओलीले नेपालको कम्युनिष्ट आन्दोलन ऐतिहासिक घटनाक्रमहरूबाट अघि बढेको उल्लेख गर्दै राष्ट्रिय स्वाभिमानका साथ देशको शिर माथि उठाउने क्षमता एमालेमा मात्र रहेको बताए । उनले मुलुकलाई लोकतन्त्र, शान्ति, विकास, सामाजिक न्याय र समृद्धिको लयमा फर्काउन एकताबद्ध भएर अघि बढ्नुपर्नेमा जोड दिए ।
बैठकमा अध्यक्ष ओलीले समसामयिक राजनीतिक प्रतिवेदन प्रस्तुत गर्ने कार्यक्रम रहेको छ । यसअघि असोज २६ गते सम्पन्न केन्द्रीय सचिवालयको बैठकले आउँदो मंसिर अन्तिम साता पार्टीको ११औं राष्ट्रिय महाधिवेशन आयोजना गर्ने निर्णय गरेको थियो ।
बैठकमा समसामयिक प्रस्ताव लेखन समिति गठन गरिएको छ, जसमा उपमहासचिव प्रदीप ज्ञवाली, स्थायी कमिटी सदस्य राजेन्द्र गौतम, र विघटित प्रतिनिधिसभाका प्रमुख सचेतक महेश बर्तौला रहेका छन् ।
त्यसैगरी, सबै केन्द्रीय सदस्यलाई तोकिएको समयमा बोल्ने अवसर उपलब्ध गराउने र बहस नोट संकलनका लागि पोलिटब्युरो सदस्य सूर्य थापा, केन्द्रीय सदस्य विष्णु रिजाल र निरज आचार्यलाई जिम्मेवारी तोकिएको महासचिव शंकर पोखरेलले जानकारी दिए ।
बैठकमा अध्यक्ष ओलीले गत भदौ २२ गते सम्पन्न दोस्रो विधान महाधिवेशनबाट निर्वाचित केन्द्रीय निर्वाचन आयोगका अध्यक्ष डा. विजय सुब्बालाई पद तथा गोपनीयताको शपथ ग्रहण गराएका छन् ।
