काठमाडौँ। नेपाल भ्रमणमा रहेका भारतका विदेश सचिव विक्रम मिश्रीले आइतबार राष्ट्रपति रामचन्द्र पौडेलसँग शीतल निवासमा शिष्टाचार भेट गरेका छन् ।
भेटका अवसरमा राष्ट्रपति पौडेलले भारतले सामाजिक, आर्थिक तथा प्राविधिक क्षेत्रमा हासिल गरेको प्रगतिबाट नेपाल लाभान्वित भएको उल्लेख गर्दै अझ बढी लाभ लिन चाहेको बताए । “एउटा उदाउँदो अन्तर्राष्ट्रिय शक्तिका रूपमा भारतको प्रगतिबाट हामी प्रसन्न छौँ । निकट छिमेकीका नाताले नेपालले भारतका उपलब्धिबाट लाभ लिएको छ र अझ बढी लाभान्वित हुन चाहन्छ,” राष्ट्रपति पौडेलको भनाइ प्रेस सल्लाहकार किरण पोखरेलले उद्धृत गरेका छन् ।
राष्ट्रपति पौडेलले नेपाल–भारतबीच सामाजिक, सांस्कृतिक, धार्मिक, आध्यात्मिक, आर्थिक तथा जनस्तरमा शताब्दीऔँदेखि सम्बन्ध रहँदै आएको स्मरण गर्दै यो सम्बन्ध सार्वभौमिक समानता, आपसी सम्मान, विश्वास र मैत्रीपूर्ण सहयोगमा आधारित रहेको बताए । उनले नेपालले भारतसँगको सम्बन्धलाई सधैं उच्च प्राथमिकतामा राख्ने र भारत सरकारको ‘छिमेक पहिले नीति’को सराहना गर्ने उल्लेख गरे ।
विदेश सचिव मिश्रीले पनि भारतका प्रधानमन्त्री नरेन्द्र मोदीको छिमेकी देशसँगको सम्बन्धलाई प्राथमिकता दिने नीतिअनुसार नेपाललाई उच्च स्थानमा राखिएको जानकारी दिए । आफ्नो भ्रमणका क्रममा दुवै देशबीच आधुनिक युगको विकास र प्रगतिका लागि ‘कनेक्टिभिटी’ विस्तारका साथै पारस्परिक हितका विषयमा सम्बद्ध अधिकारीहरूसँग छलफल गर्ने अवसर मिलेको बताए ।
