काठमाडौं। विश्वप्रसिद्ध आतिथ्य समूह म्यारियट इन्टरनेशनलका अध्यक्ष डेभिड म्यारियट पहिलोपटक नेपाल भ्रमणमा आएका छन्। नेपाल बसाइका क्रममा उनले काठमाडौंमा निर्माणाधीन ‘द लक्जरी कलेक्सन’ होटलको अवलोकन गरेका छन्।
नेपाल भ्रमणकै क्रममा उनले पहिलो होटल भ्रमणका रूपमा उक्त परियोजनाको निरीक्षण गरेका हुन्। यस अवसरमा होटलका प्रवर्द्धक शेष घले र जमुना गुरुङ घलेले उनलाई स्वागत गरेका थिए।
अवलोकनका क्रममा होटल निर्माणको प्रगति, उपलब्ध गराइने सुविधाहरू तथा नेपालको उच्चस्तरीय आतिथ्य क्षेत्रको सम्भावनाबारे जानकारी आदानप्रदान भएको बताइएको छ।
म्यारियटको यो भ्रमणलाई नेपालको पर्यटन तथा आतिथ्य उद्योगका लागि महत्वपूर्ण अवसरका रूपमा हेरिएको छ। निर्माणाधीन ‘द लक्जरी कलेक्सन’ होटल सञ्चालनमा आएपछि काठमाडौं अन्तर्राष्ट्रिय स्तरको विशिष्ट पर्यटन तथा आतिथ्य गन्तव्यका रूपमा अझ सशक्त रूपमा स्थापित हुने अपेक्षा गरिएको छ।
पर्यटन क्षेत्रका जानकारहरूका अनुसार विश्वस्तरीय होटल सञ्जालका उच्च नेतृत्वको नेपालप्रतिको चासोले मुलुकको पर्यटन क्षेत्रमा अन्तर्राष्ट्रिय विश्वास बढाउनेछ। यसले पर्यटन प्रवर्द्धन, वैदेशिक लगानी आकर्षण, रोजगारी सिर्जना तथा सेवा गुणस्तर अभिवृद्धिमा समेत सकारात्मक योगदान पुर्याउने विश्वास गरिएको छ।
