काठमाडौं। काठमाडौंको कालिमाटीस्थित स्वर्णलक्ष्मी सहकारी ठगी प्रकरणमा मुछिएका राष्ट्रिय स्वतन्त्र पार्टी (रास्वपा) का सभापति एवं पूर्व गृहमन्त्री रवि लामिछानेको बयान सकिएको छ ।

आइतबार विहान अदालतमा हाजिर भएका लामिछानेको न्यायाधीश माधव प्रसाद अधिकारीको इजलासमा बयान लिइएको थियो । आज नै थुनछेक बहस हुने बताइएपनि सरकारी वकिलले समय मागेकाले थुनछेक बहस हुन नसकेको हो । थुनछेक बहस नभएपनि लामिछानेलाई प्रहरी हिरासत पठाउने कि परिवारको जिम्मा लगाउने भन्ने विषयमा आज नै आदेश आउनेछ ।

लामिछानेको पक्षमा वरिष्ठ अधिवक्ता रमन श्रेष्ठ र सुशील पन्तले बहस गर्ने भएका छन् । कालिमाटीस्थित स्वर्णलक्ष्मी बहुउद्देश्यीय सहकारी ठगी प्रकरणमा काठमाडौं जिल्ला अदालतमा अभियोग पत्र दायर भएको थियो ।