काठमाडौं। काठमाडौं महानगरपालिकाले बागमती प्रदेश सरकारका आन्तरिक मामिला तथा कानुनमन्त्री सुरजचन्द्र लामिछानेले राजस्व बाँडफाँडबारे दिएको अभिव्यक्तिलाई गैरजिम्मेवार भनेको छ ।
बिहीबार विज्ञप्ति जारी गर्दै लामिछानेले महानगरपालिकाले राजस्व बाँडफाँडको रकम प्रदेश सरकारलाई नपठाएको विषयमा दिएको अभिव्यक्ति गैरजिम्मेवार र विषय नबुझी आएको जनाएको हो।
‘माघ २ गते बुधबार काठमाडौंमा बागमती प्रदेश सरकारले गरेको स्थानीय तहका महिला जनप्रतिनिधिहरूको क्षमता अभिवृद्धि कार्यक्रममा काठमाडौँ महानगरपालिकाले प्रदेश सरकारलाई राजस्वबाट उठेको ४० प्रतिशत रकम नबुझाएको भन्नेबारे गम्भीर ध्यानाकर्षण भएको छ’, विज्ञप्तिमा भनिएको छ, ‘माननीय मन्त्रीले काठमाडौँ महानगरले प्रदेश सरकारलाई अहिलेसम्म राजस्व नबुझाएको र बजेट माग्नेभन्दाबाहेक अरु कुरामा कहिले पनि समन्वय भइरहेको छैन भनेर दिएको अभिव्यक्ति आफैँमा गैरजिम्मेवार र विष वस्तुको जानकारी नलिई व्यक्त गरेको देखिन्छ ।’
विज्ञप्तिमा बागमती प्रदेश सरकारले जारी आर्थिक वर्ष २०८१÷०८२ का लागि जारी गरेको आर्थिक ऐनबमोजिम प्रदेशभित्रका चलचित्र घर, थिएटर र नाटकघर, भिडियो घर, सांस्कृतिक प्रदर्शन हल, कन्सर्ट, ओपेरा, क्यासिनो, डान्स बार, नाइट क्लब, दोहोरी साँझ र रोदी घर, मसाज एवम् स्पा, फनपार्क, आकाशे सिसाको पूल, फुटसल, पुल हाउस, स्वीमिङ पूल, जिम हाउस, स्विङ, वाटर गार्डेन, बाल उद्यान, पार्क, ताल तलैया, क्रुज, बोटिङ वा डुङ्गा सफारी, रक क्लाइम्बिङ, क्यान्योनिङ, बञ्जी जम्प, जिपलाइन, प्याराग्लाइडिङ, ¥याफ्टिङ, केबलकार, मेला, महोत्सव लगायतका मनोरञ्जन स्थलमा मनोरञ्जन करको दर तोकेको जनाइएको छ।
यसरी तोकिएको दर विगतमा संकलन भइरहेको दरभन्दा कम गरिएकोले महानगरपालिकाको आम्दानी घटेको यसअघि नै बताइएको विज्ञप्तिमा उल्लेख छ । महानगरका अनुसार ऐनको अनुसूची – ३ ले तोकेको दरमा मनोरञ्जन कर असुल हुन्छ । यसबाट संकलन भएको कर काठमाडौँ महानगरपालिकाको विभाज्य कोषमा जम्मा गरेर संकलित करको ४० प्रतिशत प्रदेश सरकारलाई पठाउने व्यवस्था रहेको महानगरले जनाएको छ ।
काठमाडौं महानगरपालिकाले चालु आर्थिक वर्षको साउन १ गतेदेखि पुस मसान्तसम्ममा विज्ञापन कर र मनोरन्जन कर वापत ३ करोड १३ लाख ९१ हजार ६४२ रुपैयाँ ९८ पैसा संकलन भएको जनाएको छ।
महानगरले संकलित करमध्येको ४० प्रतिशत बागमती प्रदेश सरकारको सञ्चित कोषमा दाखिला गर्ने निर्णय भइसकेको अवस्थामा प्रदेश मन्त्रीले अतिरञ्जित गर्ने गरी बोलेको पनि जनाएको छ ।
