काठमाडौं। नेपाली कांग्रेसको सांसद दीपक गिरीले स्वर्गद्वारी आश्रमको जग्गामा बसोबास गर्ने मोही किसानहरूलाई यथाशीघ्र न्याय दिन माग गरेका छन् ।
प्रतिनिधिसभाको मंगलबार सुरु भएको बैठकको सुरुवात मै सभामुख देवराज घिमिरेसँग समय माग गरेर बोलेका दाङबाट संसदमा प्रतिनिधित्व गर्ने कांग्रेस सांसद गिरीले मोही किसानसँग सरकारले यसअघि गरेको सहमति पनि स्मरण गराए ।
उनका अनुसार २०८० चैत ७ गते भूमि व्यवस्था, सहकारी तथा गरिबी निवारण मन्त्रालय र स्वर्गद्वारी गुठी पीडित मोही किसान संघर्ष समितिबीच सहमति भएको थियो । जसअनुसार स्वर्गद्वारी आश्रमको जग्गामा बसोबास गर्ने मोही किसानहरूको मागलाई सम्बोधन हुने गरी सरकारले नयाँ एकीकृत कानुन तर्जुमा प्रक्रिया सुरु गर्ने उल्लेख थियो ।
‘तर, सरकारले सहमति कार्यान्वयन नगरेको भन्दै उनीहरूले आन्दोलन सुरु गरेका छन् । मोही किसानहरूलाई मोही पूर्जा प्राप्त भए पनि जमिन प्राप्त हुन नसकेकोले आन्दोलन गर्नुपरेको उनीहरुको भनाइ छ,’ सांसद गिरीले भने, ‘यो सम्मानित सदनमार्फत् वास्तविक मोही किसानको पक्षमा सहमति अनुसार सरकारले उनीहरूसँग यथाशीघ्र न्याय प्रदान गरोस् भन्ने कुरा प्रति ध्यानाकर्षण गराउन चाहन्छु ।’
