काठमाडौँ । प्रधानमन्त्री पुष्पकमल दाहाल ‘प्रचण्ड’ले भारतसँग औपचारिक बैठकमा जमिन सट्टापट्टाको कुरा नगरिएको बताएका छन् । बुधवार राष्ट्रियसभामा भारत भ्रमणका बारेमा जवाफ दिने क्रममा प्रचण्डले अनावश्यक रूपमा जमिन सट्टापट्टाको कुरा नगर्न आग्रह गरे ।
‘माननीयले तपाईँ जमिन नै दिएर आउनु भएछ भन्नुभयो । मैले कुनै औपचारिक बैठकमा जमिन सट्टा पट्टा बारेमा कुरै गरेको छैन । खाली कालापानी, लिपुलेक, लिम्पियाधुरा नेपालको हो । ती क्षेत्रको सीमा समस्या वार्ताद्वारा हल गरिनुपर्छ भन्ने कुरा भनेको हो’ प्रचण्डले भने, ‘नेपाली पत्रकारसँग कुरा गर्दा सीमाका विषयमा धेरै खालका विचारहरू छन् ।
नेपालका बुद्धिजीवीहरूले बङ्गलादेशको मोडलमा जान सकिन्छ भनेर राख्नुभएको छ । वा बङ्गलादेश जाने बाटो पाउने हो भने त्यो पनि समस्याको समाधान हुनसक्छ भनेका छन् भनेर बोलेको हो ।’ आफूले भारतसँग प्रस्ताव राखेको वा कुरा नराखेको प्रचण्ड स्पष्ट पारे । ‘जमिन सट्टापट्टाको विषय एउटा बुद्धिजीवीले मात्रै होइन । सरकारले समय समयमा अध्ययन गराउने गरेको रहेछ । जमिन सट्टापट्टा गर्न सकिन्छ भनेर उहिल्यैदेखि भनिएको रहेछ’ उनले भने, ‘मैले आविष्कार गरेको कुरा होइन । यस्ता विचार छन् भनेर भनेको मात्रै हो ।’
