काठमाडौँ – गृहमन्त्री एवं कांग्रेस सांसद रमेश लेखकले कांग्रेसको नेतृत्वमा सरकार बनाउन लागिपर्ने बताएका छन्।
शनिबार जनकपुरमा पार्टीको मधेस प्रदेश कार्यसमितिको विशेष बैठकमा बोल्दै उनले लामो समयसम्म पनि कांग्रेसको सरकार नबनेको भन्ने नेता कार्यकर्ताको गुनासो सही भएको बताए। कांग्रेसको नेतृत्वमा सरकार बनाउन आफूहरु गम्भीर रहेको र लागिपर्ने उनको भनाइ थियो। अहिले आफूहरु संयुक्त सरकारमा रहेको बताउँदै दुई प्रतिस्पर्धी पार्टीहरुबीचको संयुक्त सरकार बनाउन केही जटिलताहरु रहेको उल्लेख गरे।
उनले भने, ‘मधेस प्रदेशको सरकार पनि हामीले पालो पालो गर्ने भनेर समझदारी गरेका छौँ। मधेस प्रदेशको सरकार पनि पालो पालो परिवर्तन गर्ने कुरा छ, परिवर्तन हुन्छ। लामो समयसम्म कांग्रेसको सरकार बनेन भन्ने कुरा छ। साथीहरुले सही कुरा भन्नुभएको छ। यो कुरालाई हामीले केन्द्रमा गम्भीरतापूर्वक लिएका छौँ। यो कुरालाई सम्बोधन गर्नका लागि हामी लागिपर्छौं।’
