फागुन २१ गते हुने प्रतिनिधिसभा निर्वाचनका लागि माघ ३ गतेदेखि निर्वाचन आचार संहिता लागू हुने भएको छ ।
निर्वाचन आयोगले निर्वाचनलाई स्वच्छ र मर्यादित बनाउने लक्ष्यका साथ आचारसंहिता लागू गर्ने अन्तिम तयारी गरेको छ।
आयोगले आगामी माघ ३ गतेदेखि आचारसंहिता लागू गर्ने तयारी गरेको जनाएको छ।
निर्वाचनको हालसम्म भएको प्रगतिका बारेमा प्रधानमन्त्री सुशीला कार्कीलाई जानकारी गराउँदै आयोगले माघ ३ गतेदेखि आचार संहिता लागू हुने जनाएकोे हो ।
निर्वाचनलाई स्वच्छ बनाउन सरकारी तथा गैरसरकारी निकायले के कस्ता गतिविधि गर्न पाउने, राजनीतिक दल तथा सरोकारवालाहरूको भूमिका के कस्तो रहने भन्ने बारेमा आचारसंहितामा प्रष्ट व्यवस्था गरिएको छ।
आचारसंहितालाई कडाइका साथ पालना गराउन सरकार र सरोकारवाला निकायको प्रमुख भूमिका रहनुपर्ने आयोगको भनाइ छ।
निर्वाचन आचारसंहिता लागू भएपछि सरकारले नियुक्ति, सरूवा बढुवा लगायतका काम गर्न निर्वाचन आयोगको परामर्श लिनुपर्छ।
त्यस्तै, बजेटमा तोकिएको बाहेक अन्य रकम विनियोजन गर्न पाउने छैन। त्यसैले सरकारलाई आयोगले आचारसंहिताको विषयमा जानकारी गराउने प्रचलन रहँदै आएको छ।
त्यस्तै आयोगले पुस ३० गते दलहरूलाई निर्वाचन आचारसंहितामा हस्ताक्षर गर्न लगाउने भएको छ। दलका प्रतिनिधिहरूले हस्ताक्षर गरिसकेपछि आयोगले आचारसंहिता कडाइका साथ पालना गराउने गरेको छ।
आयोगले पुस १२ गते आचारसंहिता स्वीकृत गरिसकेको छ। आयोगले जारी गरेको आचारसंहितामा पहिलोपटक दलहरूले निर्वाचन आयोगमा आफ्नो घोषणापत्र पेस गर्नुपर्ने व्यवस्था गरिएको छ। त्यस्तै एआईको प्रयोग गरेर प्रचार गर्ने कार्यमा निगरानी गरिँदैछ।
