काठमाडौं– सरकारसँग विगतमा भएका सहमति सम्बोधन हुने गरी विद्यालय शिक्षा ऐन जारी गर्नुपर्ने एकसूत्रीय माग अघि सारेर आन्दोलनरत नेपाल शिक्षक महासंघले बैठक बोलाएको छ ।

संघीय राजधानी काठमाडौंमा सुरु गरिएको आन्दोलनको १७औँ दिनमा प्रधानमन्त्री केपी शर्मा ओलीसँग छलफल पछि शिक्षक महासंघले शनिबार बैठक बोलाएको हो । बानेश्वरस्थित रत्नराज्य माध्यामिक विद्यालयमा दिउँसो सवा ३ बजे बस्ने बैठकमा समसामयिक विषयमा छलफल हुने अध्यक्ष लक्ष्मीकिशोर सुवेदीले जानकारी दिए ।

उनले महासंघको राष्ट्रिय समिति, महासंघमा आबद्ध पेशागत संगठनका अध्यक्ष र महासचिव, प्रदेश आन्दोलन परिचालन समितिका संयोजक, सहसंयोजक र सचिव तथा जिल्ला आन्दोलन परिचालन समितिका संयोजकहरू उपस्थित हुने बताए । देशभरका सामुदायिक विद्यालयबाट शिक्षकहरू बोलाएर संघीय राजधानी काठमाडौंमा आन्दोलन चर्काउँदै लगेपछि शुक्रबार बेलुकी प्रधानमन्त्री ओलीले महासंघसँग छलफल गरेका थिए ।

महासंघका अध्यक्ष सुवेदीले प्रधानमन्त्री ओली शुक्रबार राती ९ बजेबाट झण्डै दुई घण्टा छलफल भएको पनि बताए । उनले छलफलमा महासंघका तर्फबाट जारी आन्दोलन, शिक्षक–कर्मचारीका माग–मुद्दा र विद्यालय शिक्षा ऐन जारीबारे धारणा प्रस्ट्याइएको बताए । ‘प्रधानमन्त्रीज्यूले सरकारले सम्बोधन गर्न सक्ने कुराबारे सल्लाह गरेर निर्णय लिने तथा ऐन जारी गर्न तदारुकता दिने कुरा गर्नुभयो,’ सुवेदीले भने । उनले गएराती नै साढे ११ बजे सभामुख देवराज घिमिरेसँग पनि भेट भएको बताए ।

‘उहाँसँग विद्यालय शिक्षा विधेयक छिटो जारी गर्ने विधि र उपायबारे छलफल भयो,’ अध्यक्ष सुवेदीले भने । प्रधानमन्त्री र सभामुखसँगको भेटमा अध्यक्ष सुवेदीसँगै सहअध्यक्ष नानुमाया पराजुली, महासचिव तुलाबहादुर थापा र उपमहासचिव ९अर्थ० मदनराज जोशी सहभागी थिए ।

विद्यालय, विद्यार्थी तथा शिक्षक(कर्मचारीमैत्री अग्रगामी विद्यालय शिक्षा ऐन जारी गर्नका लागि सरकारमाथि दबाब सिर्जना गर्न छाता संगठन शिक्षक महासंघको नेतृत्वमा शिक्षकहरूले आन्दोलन गरेको शनिबार १८ दिन पुगेको छ ।