आज राष्ट्रिय धान दिवस देशभरी भव्य रूपमा मनाइएको छ । राष्ट्रपतिदेखि कृषिमन्त्री रोपाइँमा सहभागी भए । नेपाल सरकारले राष्ट्रिय कृषि अनुसन्धान केन्द्रको परिसरमा २२ औँ राष्ट्रिय धान दिवस तथा रोपाइँ महोत्सवमा मनाएको थियो । रोपाइँ महोत्सवमा कृषि तथा पशुपालन विकास मन्त्री रामनाथ अधिकारीले धान रोपेका थिए ।

१५ असारसम्म देशभरी २० प्रतिशत रोपाइँ सकिएको छ । कृषि विभागका साँझ ६ बजेसम्मको तथ्याङ्क अनुसार देशभरी १३ लाख ९१ हजार ३२१ धान रोपाइँ हुने क्षेत्रमध्ये २ लाख ८१ हजार ८०४ हेक्टरमा रोपाइँ भएको हो । जुन कुल रोपाइँ हुने क्षेत्रको २०.३ प्रतिशत रोपाइँ भएको विभागले जनाएको छ । गत वर्ष १६ असारसम्ममा २१.३ प्रतिशत रोपाइँ भएको थियो ।

देशभरी सबैभन्दा धेरै सुदूरपश्चिम प्रदेशमा ४९ प्रतिशत रोपाइँ सम्पन्न भएको छ । सुदूरपश्चिम प्रदेशमा रहेको कुल धान रोपाइँ हुने क्षेत्रफल १ लाख ७६ हजार १५१ हेक्टर मध्ये ८६ हजार ६०१ हेक्टरमा रोपाइँ भएको हो ।

यस्तै कर्णालीमा रोपाइँ हुने क्षेत्र ४० हजार ८८४ हेक्टर मध्ये १६ हजार २ हेक्टरमा रोपाई भएको छ । यस्तै लुम्बिनी प्रदेशमा ७३ हजार ७२१ हेक्टरमा रोपाइँ भएको छ । लुम्बिनीमा ३ लाख २ हजार ८८९ हेक्टरको २४.३ प्रतिशत रोपाइँ भएको हो ।

कृषि विभागका अनुसार गण्डकी प्रदेशमा २८.२ प्रतिशत अर्थात ९४ हजार १८२ हेक्टर धान रोपाइँ हुने क्षेत्रफलमध्ये २६ हजार ५६२ हेक्टरमा रोपाइँ भएको हो । बागमती प्रदेशमा २०.५ प्रतिशत रोपाइँ भएको छ ।

बागमतीमा कुल रोपाइँ १ लाख २० हजार ५४५ हेक्टर मध्ये २४ हजार ७४३ हेक्टरमा रोपाइँ भएको हो । यस्तै सबैभन्दा कम मधेस प्रदेशमा ३।९ प्रतिशत मात्रै रोपाइँ भएको छ । ३ लाख ८० हजार २८३ हेक्टर धान रोपाइँ हुने क्षेत्र मध्ये १४ हजार ७८५ हेक्टर मात्रै रोपाइँ भएको हो । कोशी प्रदेशमा २ लाख ७६ हजार ३८७ हेक्टर धान रोपाइँ हुने क्षेत्रफल मध्ये ३९ हजार ३९० अर्थात १४.३ प्रतिशत मात्रै रोपाइँ भएको छ ।

गत वर्ष १६ असारसम्म कोशीमा १३.७, मधेसमा ८.२, बाग्मती १९.।६, गण्डकीमा २१.९, लुम्बिनीमा २२.८, कर्णालीमा ४७.५ र सुदूरपश्चिम प्रदेशमा ५४.२ प्रतिशत रोपाइँ भएको थियो ।