काठमाडौं । नवलपरासी (बर्दघाट सुस्तापूर्व) को देवचुली नगरपालिकामा रहेको प्रगतिनगर खानेपानी तथा सरसफाइ उपभोक्ता संस्थाले समयमै आगो नियन्त्रणका लागि सहयोग पुगोस् भनेर दमकललाई पानी भर्ने ठाउँ (फायर हाइड्रेन्ट) जडान गरेको छ ।

देवचुली–१५ धौलागिरि चोकमा फायर हाइड्रेन्ट जडान गरेको संस्थाका अध्यक्ष खिमानन्द भुसालले बताए । नगरपालिकाभित्र कुनै पनि क्षेत्रमा आगलागी भएर विपत्को अवस्था आए तत्काल दमकलले पानी भरेर समयमा आगो नियन्त्रण गरी क्षति न्यूनीकरण गर्न सकियोस् भन्ने उद्देश्यले नयाँ फायर हाइड्रेन्ट जडान गरिएको उनले बताए ।

धौलागिरि चोकमा फायर हाइड्रेन्ट जडान गरेपछि दमकललाई आवश्यक पर्दा पानी भर्न सहज हुनेछ । नगरपालिकाका हरेक क्षेत्रमा कुनै आगलागीका घटना घटे पाँच मिनेटभित्रको दूरीमा दमकलमा पानी भर्न सकियोस् भन्ने योजनाका साथ फायर हाइड्रेन्ट जडानको योजना रहेको अध्यक्ष भुसालले बताए।

संस्थाले देवचुलीका वडा नं १०, १३ र १४ मा समेत फायर हाइड्रेन्ट जडानको योजनाअनुसार काम सुरु गरेको छ । “हाम्रो मूल उद्देश्य आगलागीका घटना भए समयमै नियन्त्रण गर्न सकियोस् भन्ने नै हो, दमकलको प्रयोग गर्दा पानी खोज्दै टाढा जानुपर्ने अवस्थामा धेरै क्षति हुनेहुँदा संस्थाबाट फायर हाइडे«न्ट जडानको काम गरेका हौँ”, अध्यक्ष भुसालले भने, “पालिकाको बजार क्षेत्रमा कतै आगलागी भए पाँच मिनेटको दूरीमा दमकललाई पानीको उपलब्धता होस भन्ने योजनाअनुसार काम गरिरहेका छौँ ।”

यसअघि संस्थाले देवचुली–१४ कैलाश चोक र देवचुली–११ धारापानी चोकमा समेत फायर हाइड्रेन्ट जडान गरिसकेको छ । आगलागी हुँदा दमकललाई आपतकालीन अवस्थामा पानी भर्न असुविधा हुँदा धेरै क्षति हुनसक्ने भएकाले जतिसक्दो छिटो दमकललाई पानी उपलब्ध गराउन सक्नेगरी काम भइरहेको उनले बताए ।