जेरुसेलम– इजरायलको हवाई आक्रमणमा मारिएको तीन महिनाभन्दा बढी समयपछि हमासले आइतबार गाजामा आफ्ना प्रमुख नेता मोहम्मद सिनवारको मृत्यु भएको पुष्टि गरेको छ ।
प्यालेस्टिनी इस्लामवादी समूहले शनिबार जारी गरेका तस्बिरहरूमा उनलाई ‘सैन्य परिषद्का शहीद’ भनेर वर्णन गरिएका अन्य राजनीतिक र सैन्य नेताहरूसँगै देखाइएको छ ।
मोहम्मद सिनवार, हमासका वरिष्ठ नेता याह्या सिनवारका कान्छा भाइ थिए । इजरायलले याह्यालाई सन् २०२३ अक्टोबर ७ मा भएको इजरायलमाथिको आक्रमणको मुख्य योजनाकारको रूपमा आरोप लगाएको थियो । हमासको इजरायलमाथिको उक्त आक्रमणले गाजा पट्टीमा हालसम्म चलिरहेको युद्धलाई भड्काएको थियो ।
कमान्डर मोहम्मद देइफको मृत्युपछि मोहम्मद सिनवारले अल–कसम ब्रिगेडको सैन्य परिषद्को नेतृत्व गरेको बताइएको छ । इजरायली सेनाले मध्य गाजाको खान युनिसस्थित युरोपेली अस्पताल मुनिको सुरुङमा उनको शव भेटिएको दाबी गरेको छ । सेनाले १३ मेमा उनलाई ‘मारेको’ घोषणा गरेको थियो ।
इजरायली तथ्याङ्कमा आधारित एएफपीको विवरणअनुसार सन् २०२३ अक्टोबरमा हमासले दक्षिणी इजरायलमा गरेको आक्रमणमा एक हजार दुई सय १९ जनाको मृत्यु भएको थियो । तीमध्ये अधिकांश सर्वसाधारण थिए ।
त्यस आक्रमणमा कब्जा गरिएका दुई सय ५१ जना बन्धकमध्ये ४७ जना अझै गाजामा रहेको र करिब २० जना जीवित रहेको विश्वास गरिन्छ ।
इजरायलको जवाफी आक्रमणले अधिकांश सर्वसाधारण गरी कम्तीमा ६३ हजार तीन सय ७१ प्यालेस्टिनीको ज्यान लिएको छ ।
यो तथ्याङ्क हमासद्वारा सञ्चालित गाजाको स्वास्थ्य मन्त्रालयले दिएको हो, जसलाई संयुक्त राष्ट्रसङ्घसहित अन्तर्राष्ट्रिय निकायहरूले पनि भरपर्दो मानेका छन् । रासस
